DILI, STLTIMORLESTE.com — Daudaun ekipa komisaun revizaun ba vaga rekrutamentu ba membru Polisia Nasional Timor Leste (PNTL) foun 2025 neebe Governu forma halo revizaun ba vaga rekrutamentu membru PNTL hahú halo ona servisu.
Nia dehan, bainhira Konselhu Ministru aprova tiha desizaun neebe deside katak suspende prosesu rekrutamentu vaga ba membru PNTL foun 2025, nunee hanesan Ministru Interiór rezolusaun Governu nian fó kbiit hodi forma kedan ekipa no ekipa sira nee hahu servisu, hahu iha loron 23 fulan Fevreiru 2026.
“Agora rezolusaun sai tiha ona, Governu mandata tiha ona, komisaun nee agora daudaun halo ona servisu, sira reuniaun tiha ona iha semana kotuk neebe agora ba oin hau labele koalia buat ruma. Tanba hau koalia politikamente bele influénsia ninia rezultadu servisu, neebe hau husik hela buat ruma imi koalia ho komisaun, komisaun mak sei anúnsia rezultadu”, hatete Ministru Interiór (MI), Francisco da Costa Guterres ba jornalista sira iha MI, Tersa (04/02/2026).
Nia esplika, ekipa sira nee kompostu husi Polísia Austrálianu sira, Guarda Nasionál Repúblikanu (GNR), ekipa Ministeriu Interiór nian, Prevedór Direitus Humanus Justisa (PDHJ), Funsaun Públika, Veteranus, Jerasaun Pátriota, Jurista balun, Ministeriu Edukasaun, Sekretária Estadu Igualdade Inkluzaun (SEII), Komisaun B Parlamentu Nasionál no Pesoa Prezidensiá Repúblika mós hola parte iha komisaun nee.
Governante nee deklara, ema sira neebe nia hili nee bele halo servisu ho trasnparánsia.
“Ita tenke fiar sira, nuudar Timoroan hau tenke fiar sira, hau hatene katak sira iha kapasidade, sira sei iha kapasidade atu bele rezolve problema nee. Neebe hau tau fiar ba sira 100%”, nia informa.
Nia garante ekipa sira nee sei rezolve problema nee no garante mós katak ekipa nee hasai rezultadu neebe mak diak.
“Komisaun supervizasun nee laos lideradu husi Komando Jerál PNTL, Segundu Komandante Jerál lae, ne’e ketak ida, ministeriu nia ema mak lidera”, nia afirma.
(jen)
