DILI, STLTIMORLESTE.com – Tuir Diretor Interinu Departamentu Investigasaun Kriminal Nasional (DIKN) Superintendente Asistenste Polísia Mouzinho Taves Correia, ekipa konjunta kompostu husi Autoridade Audoneiru (Alfandega) halo aprensaun ba droga ho tipu Kokaína (Cocaine) 2.94 kg neebe haruka husi Fransa mai Timor-Leste.
Superintendente Asistenste Polisia nee dehan, droga ho tipu Kokaína nee hahu importa husi sidadaun Fransa ho naran Douwnlou Youn Han neebe haruka husi Fransa mai Timor-Leste hahu loron 24 fulan Marsu no too Timor-Leste iha loron 28 fulan Marsu 2025. Maibe hafoin sasan sira nee too Timor iha loron 2 Abril 2025, kooperasaun entre PNTL ho Autoridade Alfandega halo pasa revista ba sasan sira nee.
“Iha loron 3 Abril, ita komesa loke sasan sira nee, bainhira ita loke ita hetan droga, droga nee ho tipu Cocaine neebe mai husi Fransa, no husi rute Fransa mai Singapura mai Denpasar (Bali) no Denpasar ba Dili ho aviaun Citilink,” hatete Superintendente Asistenste Polisia Mouzinho Taves Correia ba jornalista sira liu husi konferensia imprensa neebe halo iha Kuartel Jeral PNTL, Dili, Sesta (04/04/2025).
Nia dehan, relasiona ho kazu ida nee PNTL detein ona suspeitu estranjeiru feto ida iha sela detensaun DIKN oras 72.
“Iha Timor-Leste, ita mos identifika ema neebe ke simu sasan ida nee. Entaun bazea ba informasaun neebe ita iha, ita detein tiha ona sidadaun estranjeiru ida inisial YG neebe agora iha ita nia kontrolu. Prosesu lao hela, ohin hatama tiha ona ba Ministeriu Publiku ho numeru NUC 0090/25. PNSIK,” nia afirma.
Nia informa, prosesu ba kazu nee sei lao hela no kazu droga ida nee iha ligasaun ho krime organizadu internasional iha Meksiko no Colombia.
“Maibe ita seidauk hatene loloos nee mai husi Meksiko ka Colombia, maibe iha indikasaun katak iha envolvimentu krime organizadu sira neebe Nigeria no Meksiko,” katak nia.
Iha fatin hanesan Komisariu Alfandega, Joanico Pereira, hatete Ekipa Konjunta halo atuasaun ba merkadoria neebe hatama sasan kontra no bandu ba lei Timor-Leste nian no fo ameasa ba sidadaun Timor oan liu-liu joven sira nia vida.
Nia koalia, bainhira Alfandega simu informasaun, sira halo apuramentu ho konfidelidade, atu nunee objetu nee mai Alfandega akompanha ho rute husi Fransa mai iha Singapura ba Bali too Timor-Leste no bainhira sasan nee too, sira halo komunika atu nunee sasan nee labele ba nia nain.
“Ami nia koordenasaun ho Alfandega iha Bali hodi halo ezaminasaun ba objetu nee, infelizmente objetu nee too iha Timor ho rezultadu teste neebe uza K9 la deteta buat balun, tanba nee ami halo teste preliminariu ba area juridiku Alfandega iha Aeroportu Internasional Nicolau Lobato Dili ho modus operandu foun neebe tau iha dos (kaixa) nia laran ho falun metin, wainhira ami cek kaixa nee buat ida laiha, maibe ami halo ezamina makina X-Ray too dala hitu objetu prinsipal laiha, maibe iha makina X-Ray wainhira kaixa babain scan sai mai mutin deit, maibe kaixa ida nee ita scan, kaixa oin seluk ona, signifika ita suspeita buat ruma,” hatete Joanico Pereira.
Nia deklara, Alfandega sobu tiha kaixa nee, ekipa deteta droga nee, ho teste konfirmadu Alfandega entrega imediata mai iha PNTL liu husi DIKN, para atu bele profunda liu tan nia prosesu nee nomos kaer mos suspeitu nain ba sasan nee.
“Antes sasan nee mai, koordena ho nivel ida-idak, tanba nee hau lori Autoridade Alfandega nia naran hatoo agradesimentu ba PNTL liu husi DIKN nia kolaborasaun diak, atu guarda tiha sasan nee ba Ministeriu Publiku no ba oin ita sei servisu hamutuk atu bele kombate krime organizadu husi rai seluk neebe koko atu infiltra sasan kontra bandu mai iha ita nia rain,” nia argumenta.
Komisariu Alfandega nee afirma tan, droga ho tipu Kokaína antes nee Autoridade Polisia halo ona aprensaun iha tinan 2012 ho 2 kg resin.
(jen)
