BAUKAU, STLTIMORLESTE.com – Ekipa konjunta husi Autoridade Munisipiu Baukau hasai obrigatoriu negosiante sira neebe halao atividade negosiu iha resintu Sede Suku Bahu, Postu Administrativu Baukau Vila, Munisipiu Baukau.
Xefe ekipa konjunta atual Sekretariu Munisipal Planeamentu Investimentu no Dezenvolvimentu (PIDI), Eduardo Filipe Ximenes hateten, negosiante neebe halao negosiu iha resintu sede Suku Bahu nian, negosiante sira husi eis merkadu Vila Antiga neebe Autoridade Munisipal liu husi ekipa konjunta muda ona husi eis merkadu Vila Antiga atu ba halao fali sira nia atividade negosiu iha merkadu Munisipal Baukau, tanba Autoridade Munisipal liu husi kompanhia lokal ateru ona fatin ba sira atu harii baraka hodi halao negosiu, maibe negosiante sira la ba halo negosiu iha merkadu Munisipal Baukau, iha neebe halao fali sira nia atividade negosiu iha resintu sede Suku Bahu nian.
“Ohin ita muda obrigatoriu vendedores sira neebe mak ita muda ona iha semana kotuk, sira ba okupa fali espasu publiku iha sede Suku nian ida nee labele, sede Suku nee atu fo atendimentu publikus ba populasaun laos areadores Suku nee sai fila fali fatin ba komersializasaun,” Eduardo hateten ba jornalista sira iha nia knaar fatin Vila Nova Baukau, Tersa (27/01/2026).
Nia sublina, razaun neebe negosiante sira iha Vila Antiga la aseita atu ba faan iha merkadu Munisipal Baukau mak dehan koloka sira iha liu pakote kotuk, maibe fatin ba negosiante sira neebe Autoridade Munisipal Baukau koloka iha merkadu refere negosiante hotu hotu iha moru laran, laiha diskriminasaun negosiante ida iha kotuk no ida iha oin.
Tanba negosiante neebe faan iha merkadu Munisipal Baukau okupa iha fatin dahuluk hotu hotu negosiante roupa no tuir tan negosiante nesesidade bazika sira enkuantu negosiante modo hotu hotu iha kotuk, laiha negosiante faan modo ida iha merkadu Munisipal faan iha linha oin.
“Maioria ema iha neeba seguru kuaze tinan ida ho balu ona, tan deit ema ida ema rua iha neeba dehan la seguru, la seguru oinsa, bee iha, eletrisidade iha, dalan moru iha,” Eduardo komenta.
Xefe ekipa nee katak, fasilidade sira Mezmu natoon, maibe Autoridade Munisipal responde ona no responde mos ejizensia negosiante sira husi eis merkadu Vila Antiga, tanba ateru mos fatin ba sira, tanba nee tempu ona atu muda negosiante sira husi Vila Antiga ba merkadu Munisipal no laiha razaun seluk ba negosiante sira atu okupa fali resintu sede Suku Bahu nian ba fatin negosiu.
Maibe kona-ba sira negosiante husi eis merkadu Vila Antiga nia preokupasaun, atu Autoridade Munisipal estabelese mini merkadu ida iha area Vila Antiga, depende husi proposta Autoridade Suku no Postu, maibe nee depende fila fali ba politika Autoridade Munisipal, tanba nee husu negosiante sira atu kopera muda ba merkadu Munisipal, maibe bainhira tenta kontinua faan iha area Vila Antiga ekipa konjunta sei sobu.
Enkuantu negosiante neebe halao atividade negosiu iha resintu sede Suku Bahu nian orienta husi Autoridade Suku Bahu, maibe iha loron 27 Janeiru nee, ekipa konjunta husi Autoridade Munisipiu Baukau konsege hasai obrigatoriu negosiante sira husi fatin refere.
Liga asuntu nee STL tenta konfirma Xefe Suku Bahu, maibe lakohi fo komentariu.
Entretantu negosiante neebe ekipa konjunta hasai obrigatoriu husi resintu sede Suku Bahu nian hamutuk 36.
(jen)
