BAUKAU, STLTIMORLESTE.com – Ekipa konjunta husi Autoridade Munisipiu Baukau hahu taka loja Xina sira neebe faan sasan retalhu iha merkadu Munisipiu Baukau.
Xefe Ekipa Konjunta, atual Sekretariu Munisipal Planeamentu Investimentu No Dezenvolvimentu, Eduardo Filipe Ximenes esplika, tuir dekretu lei nu. 88 fo kompetensia propriu ba Autoridade Munisipal hodi haree asuntu komersiu nian, nunee Autoridade Munisipal ezekuta liu husi ekipa konjunta halo identifikasaun ba Xina sira neebe halo negosiu iha Baukau, liu-liu identifika lisensa neebe atribui husi Instituisaun Serve.IP.
“Se iha lisensa hateten Grosu tenke Grosu, se Grosu mak sira faan fali haknauk nee labele, nee Baukau oan bele halo nusa mak Xina mak tenke halo. Klaru taka haruka fila fali ba Dili,” hatete Eduardo Filipe Ximenes ba jornalista sira hafoin haruka Xina sira neebe halo negosiu iha area planaltu Baukau taka loja, Segunda (20/01/2025).
Xefe Ekipa nee argumenta, Xina sira neebe daudaun halo negosiu iha Baukau, Autoridade Munisipal hamutuk ho Komando Polisia Munisipiu Baukau sei deporta ba Dili, tanba tuir daskontas trabalhador rekonhese Xineza sira halo retalhu iha Baukau.
Nia sublinha, mezmu Xina hirak neebe halo negosiu iha Baukau selu taxa ba Estadu Timor Leste liu husi Instituisaun Serve I.P, maibe tenke taka, tanba faan sasan retalhu hanesan ho negosiante lokal sira bele hamate empreza Baukau oan sira nia negosiu.
Aleinde nee tuir observasaun jornalista STL nian iha terenu nota katak, Xina sira neebe halo negosiu iha Baukau, liu-liu iha area planaltu Vila Nova ekipa sira haruka Xina hamutuk loja 2 taka ona, tuir planu sei haruka fali ba Dili, enkuantu restu seluk ekipa kontinua halo identifikasaun ba lisensa neebe atribui husi Serve I.P.
Aleinde nee mos ekipa halo identifikasaun lisensa iha restorante sira, maibe la detekta erru balu.
Entretantu ekipa konjunta neebe halo identifikasaun ba negosiu estranjeiru sira nian iha Baukau, kompostu husi Diresaun Komersiu Industria, Serve I.P, Jestaun Merkadu, Autoridade Postu Administrativu neebe lidera husi Autoridade Munisipal hetan seguransa masimu husi Komando Polisia Baukau.
(EST 2)
