DILI, STLTIMORLESTE.com – Ekipa husi Ministeriu Edukasaun (ME), Komisaun Funsaun Publika (KFP) no Institutu Nasional Seguransa Sosial (INSS) halo identikasaun ba profesores moras prelongada iha Munisipiu Likisa, Baukau no Manatuto.
Kestaun nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Kinta nee (29/05/2025).
“Kona-ba reforma obrigatoriu ita sei implementa iha loron ida fulan Janeiru 2026, maibe reforma ida neebe mak kona-ba moras prelongada agora daudaun hau nian ekipa, INSS ho KFP iha terenu Munisipiu Manatuto, hodi tun ba iha baze para bele haree ita nian profesores sira neebe mak labele halao ona ninia atividades hanesan hanorin iha eskola, ekipa sira nee halo identifikasaun laos iha eskola, maibe ba deit iha profesor sira nian uma. Provizoriu ita foin mak halao iha munisipiu tolu, fulan kotuk ita halo lansamentu iha Munisipiu Likisa, ita kontinua ba iha Baukau, agora kontinua tan iha Munisipiu Manatuto,” nia esplika.
Nia afirma, daudaun nee ekipa identifika hela profesores neebe moras iha Munisipiu Manatuto, tuir fali mak sei haree munisipiu neebe mak prepara ona ba profesor neebe mak moras, depois konfirma ho parte rekursu umanu sei konfirma fali ho KFP no INSS hodi tun ba iha munisipiu neebe mak prepara ona bele ba halo esplikasaun ba profesor sira nee.
“Ita nian dadus profesor moras prelongada iha Munisipiu Likisa nee hamutuk 22, Baukau iha 30 resin, maibe agora iha verifikasaun no prosesu hela, tanba ami sei presiza sira nian dokumentus, Manatuto nian agora daudaun ami nian ekipa sei halo identifikasaun iha terenu,” katak nia.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, profesores neebe mak moras prelongada nee dadus haruka ba ona iha rekursu umanu nasional.
“Kona-ba ita nian profesores neebe moras prelongada nee ita haruka ona dadus ba ita nian rekursu umanu nasional ME nian, atu nunee bele haree asuntu ida nee,” niia afirma.
(jac)
