DILI, STLTIMORLESTE.com – Ekipamentus pratika iha Eskola Sekundáriu Tekniku Vokasional rua iha Munisipiu Manatuto sufisiente ba estudantes sira, hodi bele uza halo pratika.
“Ita nian ensinu tekvo iha Munisipiu Manatuto nee rua deit, ida iha Natarbora nee mak sira nian ekipamentus komputador nee hetan ajuda husi UNDP. Nee duni ita nian tekvo rua nee agora dadaun ninia fasilidade kompletu hotu,e kipamentus hanesan komputador hetan ajuda husi UNDP, liu husi governu Japaun fo komputador 30 ba tekvo ida iha Natarbora, nee duni parte tekniku halo ona instalasaun,” dehan Diretor Servisu Edukasaun Munisipiu Manatuto, Patricio da Cruz ba STL liu husi telefone, Kuarta (19/11/2025).
Nia dehan, agora dadaun tekvo rua iha Manatuto nee ninia ekipamentus sufisiente hela ba estudantes sira, atu nunee estudantes sira bele halo pratika iha eskola. Ekipamentus mak hanesan komputador no seluk tan.
Iha parte seluk Diretor Servisu Edukasaun Munisipiu Ainaro, Patricio da Costa Magno haktuir, ensinu tekvo iha Ainaro 4 deit, agora konaba ekipamentus pratika nian ba eskola tekvo 4 nee kompletu hela ba estudantes sira, tanba nee ho ekipamentus neebe mak iha estudantes sira bele uza halao pratika.
Jornalista: Tomas Reis
Editora: Domingas Gomes
