BAUKAU, STLTIMORLESTE.com – Atendimentu iha Sekretariadu Tekniku Administrasaun Eleitoral (STAE) Munisipiu Baukau lao hanesan baibain, maibe eleitores trata kartaun eleitoral ba biometriku menus, tanba laiha blanku.
“Oras nee daudaun ita nia atendimentu lao normal, kartaun blanku mak laiha, ema mai atendimentu nee menus tanba ema lakohi hein kleur,” hateten Diretor STAE Baukau, Natividade Freitas Guterres ba STL iha knaar fatin Vila Nova Baukau, Segunda (27/05/2025).
Nia sublina, mezmu blanku kartaun eleitoral Biometriku iha STAE Munisipiu Baukau daudaun laiha, maibe servisu atendimentu kontinua lao hanesan simu dokumentus eleitores sira hodi rejistu naran eleitores iha sistema hein ba prosesu impreme bainhira iha ona stok blanku.
Maibe durante stok blanku iha STAE Munisipiu Baukau, numeru eleitores rejistu naran iha sistema menus kompara ho stok blanku sei iha, tanba razaun eleitores sira lakohi hein kleur.
“Ema hakarak nee loron ida rua foti ona, maibe balun too ona fulan haat ona kleur liu seidauk foti, tanba nee dala ruma ema konta ba malu entaun eleitores balun lakohi mai,” Natividade akresenta.
Dirijenti STAE Munisipiu Baukau nee hateten, eleitores sira iha Munisipiu Baukau neebe naran seidauk rejistu iha sistema eleitoral biometriku, husu hakbesik aan ba edifisiu STAE Munisipal hodi submete dokumentus no rejistu naran hein prosesu emprime bainhira stok blanku parte nasional rezolve ona.
Eleitores Lourenço dos Santos sente triste ho trata kartaun eleitoral Biometriku, tanba troka eleitoral semi biometriku ba biometriku rejistu iha fulan Fevereiru tinan nee no daudaun too ona iha fulan Maiu nia rohan, maibe seidauk iha rezultadu, tanba razaun blanku ba kartaun eleitoral laiha.
“Hau sente triste, tanba hau eskola iha Dili, hau mai ona dala rua iha nee cek hau nia eleitoral, maibe dehan seidauk iha,” hateten Lourenço.
Estudante Universidade Dili nee husu Governu atu urjente responde stok blanku eleitoral, tanba eleitoral importante ba kada sidadaun atu utiliza ba estudu no konkore vaga sira, maibe daudaun labele produs kartaun eleitoral, nee fo impaktu ba sidadaun neebe seidauk iha kartaun eleitoral atu kontinua eskola no konkore vaga ruma.
(tom)
