DILI, STLTIMORLESTE.com – Reprezentante povu iha Parlamentu Nasional (PN) preokupa ho linha eletrisidade neebe kada loron mate beibeik no afeta ba populasaun nia sasan eletroniku sira aat.
Deputadu Bankada FRETILIN David Dias Ximenes “Mandati” hatete, Prezidente EDTL tenke fo atensaun se lae maka bele estraga ema ninia sasan sira aat, se maka responsabiliza.
“Eletrisidade sira ohin loron mate lakan ida nee estraga sasan barak ona bele karik koalia ho ita nia Prezidente Eletrisidade ninian nee ba para atu toma atensaun ruma se lae sasan barak sei ita lakon,” hatete nia liu husi Plenaria Parlamentu Nasional, Dili, Segunda (26/01/2026).
Fatin hanesan Deputada Bankada FRETILIN Jose da Cruz reforsa, tekniku husi Vise Ministru Asuntu Parlamentar rejista preokupasaun hirak nee hatoo ba parte relevante atu tau atensaun ba ahi eletrisidade mate lakan.
“Hanesan ohin hatete ona tekniku husi Vise Ministru Asuntu Parlamentar nian iha nee hau sira bele anota, kona-ba komunidade sira iha Bobonaru liu-liu iha postu Bobonaru nian sira aprezenta preokupasaun kona-ba eletrisidade neebe maka mate lakan mate lakan afeita ba sira nia sasan elektroniku,” nia dehan.
Tanba ida nee maka komunidade sira husu ba Governu liu-liu EDTL iha responsabilidade entaun tenke haruka sira nia tekniku sira atu bele haree ka monitoriza iha terrenu, nunee ahi eletrisidade nee hodi labele ahi mate lakan afeita ba ema ninia sasa sira.
Nunee mos Deputadu Bankada CNRT, Gabriel Soares apresia ba serbisu Governu nian liu-liu Ministeriu das Obras Publikas liu husi diresaun ida kona-ba eletrisidade ninian buat hotu serbisu sira lao, maibe atu fo hanoin nafatin ba sira tenke tau atensaun.
“Fo hanoin nafatin ba sira katak tenke tau atensaun mos ba iha eletrisidade riin sira neebe mak instala karik iha mota klaran hanesan dadaun Manatutu Vila ninian riin ida rua iha mota laran no liu ba Leleia nian mos hanesan, tanba ita antesipa kuandu ita haree ohin loron udan no mota tun labele sobu,” hatete nia.
Nia hatutan, se mota tun sobu nee bele prejudika ahi, tanba haree katak eletrisidade nee importante tebtebes, tanba komunidade maioria kuaze haree katak uza ahi oinsa ba nesesidade vida lorloron ninian.
(alb)
