DILI, STLTIMORLESTE.com – Ho situasaun neebe mak akontese ahi eletrisidade mate durante oras rua iha sala operasaun Hospital Nasional Guido Valadares (HNGV), Sosiedade Sivil konsidera fo perigu neebe fatal ba ema nia vida.
Diretor Ezekutivu Asia Fundation And Rights (AJAR), Inocencio de Jesus Xavier hatete, HNGV hanesan Hospital Nasional, tanba nee eletrisidade kuandu mate fo risku ba pasiente.
“Konsekuensia klaru katak Hopital Nasional Guido Valadares nuudar hospital uniku iha Timor Leste, kategoriza Hospital Nasional, eletrisidade bele fo impaktu liu ba sala de operasaun nian, neebe mak iha momentu doutor sira halo hela operasaun mak ahi mate derrepente, nee bele afeta ba ema nia vida, ida mak ema sira neebe mak fase raan, tanba pasiente fase raan nia ajenda iha tuku 8:00 tenke tuku 8:00, tanba nee lalika falha iha minitu ida ka rua nia laran,” hatete Diretor Ezekutivu Asia Fundation And Rights (AJAR), Inocencio de Jesus Xavier ba jornalista STL iha nia knaar fatin Farol, Tersa nee (04/03/2025).
Inocensio hatete, koalia kona-ba eletrisidade problema klasiku ba Governu ida ba Governu seluk, tanba ne’e Governu too ohin loron seidauk fo solusaun, maske iha ona Orsamentu Jeral Estadu (OJE) neebe aloka ona.
Tanbe nee, tuir informasaun neebe mak dala ruma Sosiedade Sivil asesu liu husi ema importante sira balu neebe mak Jere EDTL katak, EDTL iha problematiku balu neebe mak daudaun nee hasoru, ida mak sistema automatiku ida hodi detekta kauza sirkuitu sira, trafus sira ne’ebe uza dezde tempu Indonezia seidauk halo manutensaun inklui liga ahi eletrisidade barak.
Iha Sorin Seluk, Diretor Luta Hamutuk, Jose Alves da Costa hatete, ahi mate lakan iha HNGV, tanba falha iha komunikasaun entre EDTL ho HNGV rasik .
(EST 3)
