BAUKAU, STLTIMORLESTE.com – Enerjia eletrisidade soke ema nain 3 iha Suku Matahoi, Postu Administrativu Uatulari, Munisipiu Vikeke, rezulta nain 1 mate no nain 2 seluk daudaun halao hetan tratamentu iha Hospital Nasional Guido Valadares (HNGV) Dili, tanba kondisaun grave.
Xefe Suku Uaitame, Postu Uatulari, Marcelino Pinto Alves haktuir, insidente nee akontese iha loron 09 Novembru 2025, bainhira sidadaun nain 3 halao servisu hanesan halo perfurasaun bee moos iha sidadaun Manuel Freitas nia uma, Aldeia Mauselok, Suku Matahoi, no bee moos refere antes nee halo ona perfurasaun, maibe sidadaun sira hakarak aumenta tan perfurasaun metru 2 atu antisipa iha tempu bailoron bee refere labele maran.
Nunee sidadaun refere atu aumenta torneira, maibe torneira refere baku kona fiu eletrisidade nunee enerjia eletrisidade kona sidadaun nain 3, rezulta nain 1 mate no nain 2 iha faze tratamentu.
“Ida mate naran Ernesto Gusmão husi Suku Uaitame, Aldeia Makadiki, nian nain 2 iha Hospital nee ida Manuel Freitas husi Aldeia Mauselok, Suku Matahoi, ida fali Suku Afaloikai nian nee mak hau la hatene nia naran,” Marcelino konta ba jornalista STL liu husi telefone, Kinta (13/11/2025).
Nia komenta, sidadaun nain 3 refere husi Postu Administrativu Uatulari hotu no difirensia iha Suku, maibe nuudar familia fetosan umane hela hamutuk iha Suku Matahoi, tanba nee husu ajuda ba malu hamutuk hodi utiliza makina perfurasaun husi sidadaun identidade Ameu, maibe sidadaun Ameu hamriik dook no sidadaun nain 3 refere mak halao servisu, maibe sala iha hasai torneira nunee enerjia eletrisidade alastra ba sira nain 3 hodi nain 1 lakon vida no nain 2 seluk kondisaun grave, daudaun halao tratamentu iha HNGV Dili.
Nia sublina, insidente refere daudaun rejistu ona iha Komando Polisia Munisipiu Vikeke, maibe parte familia matebian no vitima sira hakarak atu rezolve tuir familia, tanba iha relasaun fetosan umane.
“Sira kombina tuir familia halo despensa deit ba matebian nia hakoi ho karau ida fahi ida ho tan sasan balu too aifuan, neebe ami halo ona akordu ida atu hatama fali iha Polisia para tarik fali kazu nee, rezolve tuir familia,” Marcelino informa.
Liga asuntu nee STL tenta konfirma Komadante Komando Polisia Munisipiu Vikeke liu husi telefone, maibe la atende kontaktu.
Jornalista: Tomas Reis
Editor: Xisto Mendonça
