DILI, STLTIMORLESTE.com – Sekretariu Estadu Komunikasaun Sosial (SEKOMS ), Expedito Dias fo tomada pose ba Elizeu Isac Fernandes, hodi asumi knaar hanesan Prezidente Konselhu Administrasaun Radio no Televisaun Timor Leste, Empreza Publika (RTTL, E.P) ba periodu 2025 too 2029.
Tomada pose nee bazeia ba rezolusaun Governu Nu. 15 /2025 loron 26 Fevereiru 2025 hodi ezonera Prezidente RTTL, E.P sesante Jose Taraleu Belo, hodi indika fali Elizeu Isac Fernandes ba Prezidente foun ba mandatu 2025 too 2029.
Iha ambitu serimonia tomada pose nee SECOMS, Expedito Loro Dias Ximenes husu ba Prezidente foun ho membru Konselhu Administrasaun hotu atu jere instituisaun RTTL, E.P ho responsabilidade.
“Hau husu ba Prezidente foun no membru administrasaun sira hotu atu jere ho responsabilidade no prinsipiu de boa fe estratéjia oin-oin hodi bele garante RTTL, E.P ninia bom funsionamentu, atu nune’e bele responde duni nesesidade povu nian iha setor komunikasaun sosial,” tenik Expedito Dias liu husi nia diskursu iha salaun enkontru PCM, Kinta (13/03/2025).
Governante nee haktuir, Rádio no Televizaun Timor Leste hanesan Empreza Publika iha órgaun Komunikasaun Sosial Estadu nian hodi halo prestasaun servisu públiku ba radio difusaun no televizaun tuir lejislasaun aplikável no respetivu kontratu no konsesaun neebe vigora.
“Ho nunee hau husu ba Prezidente foun atu bele utiliza rekursu Estadu nian de melhor forma posível, hodi bele rezolve problema no halo jestaun efikaz no efisiente ba osan públiku hodi bele garante sustentabilidade no susessu RTTL, E.P,” dehan nia.
Governante nee husu mos ba jornalista no trabalhadores sira hotu atu bele servisu hamutuk no servisu ho dedikasaun no empenhu, tanba RTTL, E.P nia susesu depende ba ita boot sira hotu ho linhas orientadores Governu nian neebe konsagra iha dekretu lei 42/2008.
Iha fatin hanesan, Prezidente Konselhu Administrasaun RTTL, E.P, Elizeu Isac Fernandes haktuir, nia hatoo apresiasaun ba IX Governu Konstituisional, tanba tula ona konfiansa hodi lidera RTTL, E.P.
“Hau nia apresiasaun klean ba IX Governu Konstitusional lideradu husi Primeiru Minstru, Kay Rala Xanana Gusmão hamutuk ho elementu, membru Governu hotu neebe tula konfiansa mai hau hanesan bibi atan ida ba haknaar aan iha RTTL, E.P hodi servi Timor Leste,” Katak Elizeu.
(EST 2)
