BAUKAU, STLTIMORLESTE.com – Ema nain 19 kanek, motor 4 estragus, 1 hetan sunu, inklui uma komunidade 4 rahun ba kazu konfrontu iha Aldeia Lekiloiwatu, Suku Triloka, Postu Administrativu Baukau Vila, Komando Polisia Munisipiu Baukau identifika ona suspeitu nain 5 ba kazu nee.
Enkuantu konfrontu refere deskonfia involve husi joven membru Arte Marsiais sira, bainhira partisipa iha festa koremetan neebe realiza iha loron 17 Novembru 2024 iha Aldeia Lekiloiwatu, maibe too parte tuku 03:00 madrugada mosu konfrontu, tanba provoka malu.
“Koremetan nee sira konvida ema husi fatin fatin, situasaun nee Autoridade Seguransa deskonfia grupu sira halo provoka malu tuda malu, autor ita kaer hamutuk nain 5, vitima neebe kanek nain 19,” hateten Komandante Komando Polisia Munisipiu Baukau, Superintendente Xefe Polisia, Antonio Maria de Sa ba jornalista sira, iha Vila Nova, Baukau, Kinta (21/11/2024).
Suspeitu nain 5 nee tuir nia inisial mak hanesan CF, MSF idade 54, ADS idade 43, FDS idade 42 no DMS idade 20, neebe identifika ona hodi detein iha sela Komando, daudaun aprezenta ona ba Ministeiru Publiku atu prosesu kontinuasaun.
Mezmu parte Komando aprezenta ona suspeitu nain 5 refere ba MP, maibe Komando sei kontinua dezenvolve prosesu buka tuir suspeitu seluk ba kazu refere, tanba deskonfia sei iha autor balun neebe subar aan husi konfrontu tuda malu rezulta komunidade nia uma balun hetan estragus iha area refere.
No husi ema nain 19, nain 18 nuudar joven membru grupu Arte Marsiais nian neebe mak inklui mos tuda malu iha area refere hodi rezulta nain 2 mak kanek grave, 1 hetan tohar iha parte ain no nain 1 seluk hetan kanek iha parte matan fukun, tanba hetan tuda husi sira nia atake malu, enkuantu nain 1 seluk nuudar komunidade baibain la inklui grupu ruma no la envolve iha konfrontu refere.
Nunee, Komando Polisia Munisipiu Baukau komprimitudu sei esforsu hodi halo dialogu iha area refere fo motivasaun ba jovem sira atu hadook aan husi komflitu, tanba nee laiha benefisiu ba nesesidade dezenvolvimentu nasaun nian.
(EST 2)
