DILI, STLTIMORLESTE.com – Lei numeru 7/2020 26 Agostu, Medida Prevensaun Kombate Korrupsaun (MPCC – sigla português) obriga ema hotu neebe sujeita ba deklarasaun nee, atu deklara sira nia rendimentu ben no interese.
Diretor Jeral Prevensaun no Sensibilizasaun, Antonino Alves ba Cruz hatete, tuir artigu 29 deklara nee iha oin rua, kargu no funsaun, kona-ba kargu mak ba nivel xefia sira tomak, no funsaun mak ba sira neebe iha area potensia risku hanesan, funsionariu sira neebe servisu iha area aprovizionamentu husi nia dirijenti tun too funsionariu sira hotu. Iha area ida neebe kobre reseitas ba estadu, husi nia dirijenti too tun ba iha funsionariu sira. No polisia sira neebe iha area investigasaun kriminal, husi dirijenti tun too iha funsionariu sira hotu, no mos sira neebe halo auditoria, supervizaun, fiskalizasaun, katak ita hasoru ho ema seluk hotu-hotu sujeita ba iha deklarasaun rikusoin.
“Husi tinan ida nee ema neebe mak ita rejista ona iha ita nia sistema hamutuk 3.879, fahe ba feto 1.170 no mane 2.709, neebe mak oras nee rejistradu ona iha sistema,” dehan Antonino ba jornalista sira iha Matadoru, Kuarta (15/01/2025).
Nia hatutan, husi ema 3.879 fahe ba tipu deklarasaun ida bolu naran tipu deklarasaun inisial ba sira neebe foin simu kargu ou funsaun iha tinan anterior mak ema 1,361, tipu deklarasaun annual katak ema sira neebe uluk rejistu tiha ona mai kontinua atualiza fila fali 2050, tipu deklarasaun pos ezersisiu nee remata tiha nia mandatu 155, tipu deklarasaun final reforma ona husi nia kargu 44, tipu deklarasaun trianual ba funsionariu sira neebe la iha kargu mak 242, no tipu deklarasaun substansial 27, mak oras nee rejistradu ona iha sistema deklarasaun rendimentu ben no interese.
Tanba lei hatete bainhira remata mandatu, hanesan ohin remata sura husi nia remata nia mandatu nee, ba oin loron 30 nia tenke presta nia deklarasaun, atu hatene katak nia hahu nia kargu ho rikusoin hira, no termina fali nia kargu ho rikusoin hira mak iha.
Lei hatete la hotu deit, iha nee maske nia remata tiha ona, maibe tinan tolu nia laran nia nafatin deklara. Ezempu nia remata iha fulan Agostu nia tenke deklara iha Agostu no tinan oin fulan Agostu tenke kontinua fali too dala tolu mak foin remata. Se asumi fali kargu balu, nia komesa presta fali tama iha tipu deklarasaun inisiu.
Atu identifika rikusoin sira nee ida liu husi verifikasaun auditoria formal, ida mak investigasaun auditoria investigativu, no auditoria formal prienxe hotu sira nia ekia sei haree prienxe nee los ka lae, maibe la haree nia substansia, haree deit mak nia hakerek nee los ka lae, iha mos prazu atu fo hatene loron 15 husi hadia.
No ida investigasaun auditoria, investigativu nee sasan hotu neebe nia deklara nee tenke ba verifika hotu iha terenu hodi haree, se iha uma ba haree hodi sukat, se karreta iha haree, hodi husu dokumentus iha Diresaun Transporte Terestre hodi haree loos duni nia karreta rua, keta halo nia subar tiha ida lei hateten omisiu subar, nia prosesu lori ba too Tribunal hodi deside katak, sasan neebe nia subar 50% ba nia nain 50% ba Estadu.
Iha fatin ketak, Komisariu KAK, Rui Pereira dehan, deklarasaun rikusoin importante tebes, hodi tulun KAK no MP halao sira nia knaar.
“Deklarasaun rikusoin importante tebes, hodi tulun KAK no MP halao sira nia knaar,” dehan nia.
(ter)
