BAUKAU, STLTIMORLESTE.com – Tempu kalan ema deskonhesidu book odamatan kuartu ba pesoal saude parteira no estragus fasilidade hanesan tuda rahun vidru iha Sentru Saude Tirilolo, Munisipiu Baukau.
“Iha fulan liu ba ita haree fatin ladun seguru barak liu iha tempu kalan, dala ruma ema mai tuda fasilidade, dala ruma sira mai menganggu liu liu kolega parteira sira neebe servisu iha tempu kalan, mai book odamatan,” hateten Xefe Sentru Saude Tirilolo, Luíza da Costa Belo ba jornalista STL iha knaar fatin, Kinta (22/05/2025).
Nia esplika, asaun refere akontese hahu kedas iha tinan 2024 no too tinan 2025, kuaze estragus ona fasilidade hanesan vidru janela liu husi tuda rahun dala tolu hodi rezulta vidru unidade 10 inklui book odamatan kuartu ba parteira sira.
Nia sublina, durante akontesimentu sira, parte Sentru Saude hatoo keixa ba Komando Polisia Munisipiu Baukau liu husi Polisia Eskuadra Postu Baukau Vila no too agora laiha rezultadu ba identifikasaun ba autor ruma.
“Ami halo keixa antes hau seidauk sai Xefe Sentru Saude, depois hau sai Xefe Sentru Saude hau keixa dala haat ona, maibe ema ita la haree,” Luíza akresenta.
Nia argumenta, asaun neebe ema deskonhesidu halo liu husi book odamatan kuartu no tuda fasilidade halo tauk pesoal saude parteira sira neebe servisu kalan, tuir lo-loos asaun refere la merese akontese, tanba servisu saude fo tulun ba sidadaun hotu, maibe ema laiha konsiensia halo asaun hasoru saude.
Nia fundamenta, mezmu keixa neebe hatoo laiha rezultadu, maibe agradese, liu husi esforsu Autoridade Postu no Servisu Saude Munisipal responde ona preokupasaun, tanba koloka ona pesoal seguransa hodi asegura.
“Agora ami iha ona seguransa neebe mak diak bele asegura ona fatin nee, iha fulan Abril nia laran nee buat hotu lao diak,” Luísa hakotu.
(tom)
