BAUKAU, STLTIMORLESTE.com – Iha tuku 01:50 madrugada, loron 01 Agostu, ema deskonhesidu harahun uma komunidade Pascoal Moreira iha Suku Tirilolo, Postu Administrativu Baukau Vila, Munisipiu Baukau.
“Akontesimentu iha hau nia uma hodi kalan tuku 01:50 mak deskonhesidu mai aserta hau nia uma janela rua rahun hotu, sira baku no tuda, hau la hatene, tanba hau toba,” uma nain Pascoal Moreira informa ba jornalista sira iha Tirilolo Baukau, Sesta (01/08/2025).
Nia haktuir, antes ema deskonhesidu harahun vidru janela fo uluk ona sinal lao ba mai iha resintu uma nian no sinal nee labarik sira hatene, tanba sei hader estuda hela, maibe la deskonfia atu asaun nee akontese, tanba uma besik estrada publiku neebe livremente ema hotu atu lao ba mai iha kualker tempu, maibe la espera asaun tuda no baku akontese kedas iha vidru janela ba kuartu rua nian rahun iha oras tuku 01:50 madrugada.
Asaun ema deskonhesidu harahun vidru janela husi kuarta rua nee, Pascoal sente triste, tanba durante nee la iha problema ho vizinhu sira hotu, maibe derepende asaun nee akontese.
“Hau hela iha nee nunka halo problema ho komunidade iha nee. Hau la deskonfia ema ida, soke derepente mai tuda hau nia uma. Hau hatoo tiha ona ba Polisia Eskuadra Postu Baukau Vila,” nia argumentu.
Uma nain nee informa, kazu refere aprezenta ona ba Polisia Eskuadra Postu Baukau Vila, tanba nee husu parte polisia sira buka tuir autor ba kazu refere.
Liga asuntu nee STL tenta konfirma Komadante Komando Polisia Munisipiu Baukau, maibe seidauk hetan komentariu, tanba relatoriu ba kazu refere, parte Polisia Eskuadra Postu Baukau Vila seidauk relata ba Komando Polisia Munisipiu.
Entretantu ba asaun ema deskonhesidu harahun vidru janela iha uma komunidade Pascoal Moreira nee, la rezulta ema kanek no estragus sasan seluk.
(tom)
