VENILALE, STLTIMORLESTE.com – Ema deskonhesidu naok idoza Santina Ximenes Soares ho idade 67 nia karau vaka inan hamutuk 4 iha Aldeia Baha-Dato, Suku Fatulia, Postu Administrativu Venilale, Munisipiu Baukau.
Idoza Santina Ximenes Soares hateten, karaun vaka neebe nia hakiak hamutuk 5 inklui ida husi oan mane neebe iha loron 29 Janeiru 2026 parte loraik kesi iha area Ramelaran dook husi uma hela fatin, maibe iha loron 30 Janeiru 2026 parte dader ba atu ba haree karau refere, maibe karau inan 4 refere laiha ona iha fatin, hela deit mak karau nia tali rohan ida no dikur ida.
“Naok nee hodikalan ami moos dook karau moos dook, ohin ami ba haree mak nia fatin deit mak hela iha neeba, karau hamutuk 4 nee inan hotu boot 2 kiik 2,” Santina hateten ba STL iha Fatulia, Sesta (30/01/2026)
Nia esplika, karau inan 2 neebe ema deskonhesidu naok nia kesi ona durante tinan 7 neebe atu faan karik ida ho folin US$ 1.000. Nomos husi karau oan 2 neebe ema deskonhesidu naok atu faan karik ida ho folin US$ 500, maibe sofrementu neebe idoza nee infrenta durante kuida kesi karau refere ema deskonhesidu naok hodi goza nia sakrifisiu hirak nee.
Nia nota, ema deskonhesidu neebe naok nia karaun ho kareta, tanba dadersan nia parte too iha karau fatin iha mos roda fatin kareta nian ho nunee situasaun nee nia parte hatoo kedas Informasaun ba Autoridade Suku Fatulia no Polisia Eskuadra Postu Venilale atu buka tuir autor ba naok refere.
“Hau fo hatene Amu Liurai, Amu Liurai dehan fo hatene polisia ami nain 2 feto foun sae ba polisia, koalia nee tau deit naran polisia dehan liu tiha ona nee ita atu halo nusa nee imi karau nain tenke buka didiak ba,” Idoza Santina katak
Iha fatin hanesan Xefe Suku Fatulia Angelino Moisés Pereira sente preokupa ho asaun ema deskonhesidu naok karau iha Suku Fatulia, tanba asaun naok animal iha Fatulia kuaze tinan 10 resin ona la akontese, maibe foin akontese fali iha inisiu tinan 2026.
“Situasaun ida nee ita sente la satisfas, tanba naok ema nia sasan habokur fali sira nia aan, komunidade neebe sakrifika sira nia aan kuidadu sira nia animal ba tempu naruk ikus mai sira nia sakrifisiu nee husik leet deit,” Angelino komenta
Xefe Suku argumentu, nuudar Autoridade Suku nafatin esforsu halo kooperasaun ho parte seguransa atu buka estratejia nunee bele detekta autor naok komunidade nia karau iha Suku Fatulia.
(tom)
