BAUKAU, STLTIMORLESTE.com – Ema deskonhesidu naok komunidade sira nia karau 2 no kuda 1 iha area Benduku, Suku Umanaulo, Postu Administrativu Venilale, Munisipiu Baukau.
Xefe Suku Umanaulo, Narciso da Costa Belo informa, ema deskonesidu naok komunidade sira nia animal hanesan kuda no karau akontese iha loron iha loron 28 Julhu parte kalan.
“Ema naok nee karau rua kuda ida nee mak naok ten lori lakon, pois karau ida mak sira futu metin hatama kareta la diak entaun soe hela deit iha estrada ninin,” informa Narciso ba jornalista STL liu husi telefone, Kuarta (30/07/2025).
Nia sublina, asaun ema deskonhesidu naok karau no kuda laiha sidadaun sira inklui nain ba animal hetan, tanba naok iha tempu kalan momentu komunidade sira toba dukur, maibe iha tempu dader bainhira komunidade nain ba karaun no kuda hader mai haree animal hirak nee laiha ona iha fatin kesin.
Nia deskonfia, dala ruma ema deskonhesidu sira atu naok karau 3 no kuda 1, maibe karau 1 ema deskonhesidu sira lakonsege foti, tanba soe hela deit iha estrada ninin mezmu kesi metin ona karau nia liman ain.
“Nee ema deskonhesidu mak naok, maibe ami hatoo ona ba Komadante Eskuadra Postu Venilale nomos Administrador Postu, maibe nee hanesan fahe informasaun deit, tanba buat nee akontese fila fila,” Narciso akresenta.
Asaun ema deskonesidu naok karau 2 no kuda 1 refere, parte Autoridade la deskonfia sidadaun balun ba asaun refere, maibe aprezenta ona keixa iha Autoridade relevante sira hodi haree kestaun refere, tanba kazu naok animal iha Suku Umanaulo kuaze akontese beibeik ona, maibe la indentifika ema ruma ba asaun sira.
No Autoridade Suku mos sei halo sosializasaun iha Umanaulo ba objetivu atu evita komunidade sira tula sai animal husi area Umanaulo iha tempu kalan, nuudar meius ida atu evita, tanba komunidade sira nia aninal iha Umanaulo kuaze lakon iha tempu kalan deit.
Entretantu karau rua neebe ema deskonesidu naok pertense ba komunidade António Marcos Correia no kuda pertense ba komunidade Augusto Xanana.
(tom)
