BAUKAU, STLTIMORLESTE.com – Autoridade Munisipiu Baukau bandu negosiante sira kalan toba iha merkadu Tuanau, maibe la destaka pesoal seguransa, nunee ema deskonhesidu naok negosiante sira nia sasan ho folin US$ 1.500 iha merkadu neeba.
Negosiante Crispin Filipe Soares hateten, fasilidades iha merkadu foun Tuanau la sufisiente liu-liu instalasaun eletrisidade ba negosiante sira nia baraka balu, parte Eletrisidade Timor Leste, Empreza Publika (EDTL, EP) seidauk kompleta, tanba nee iha tempu kalan ema deskonhesidu aproveita hodi naok sasan neebe negosiante sira faan iha merkadu foun refere.
Maibe inisiu muda negosiante sira husi merkadu tuan Vila Nova, Beskem inklui Vila Antiga ba merkadu foun, Autoridade Munisipal promete sei destaka pesoal seguransa hodi asegura negosiante sira nia sasan iha tempu kalan.
Nia sublina, nunee negosiante sira hotu koopera hodi harii rasik baraka iha merkadu foun utiliza ba negosiu no Autoridade Munisipiu Baukau la permite atu negosiante sira kalan toba iha merkadu hodi hein sasan, tanba Autoridade sei destaka pesoal seguransa hodi asegura sasan sira, maibe inisiu merkadu foun Tuanau funsiona too ohin loron laiha pesoal seguransa, nunee ema deskonhesidu aproveita naok negosiante sira nia sasan iha tempu kalan.
“Autoridade Munisipiu dehan labele toba iha laran, tanba dehan seguransa iha, ami hanoin katak seguransa iha ona nee mak ami la toba iha laran, fila hotu ba uma naokten mak tama mai fali naok ami nia sasan,” hateten Crispin ba jornalista sira iha merkadu Tuanau, Segunda (17/03/2025)
Nia sublina, merkadu foun Tuanau moru haleu no kompleta ho portaun rua (2) kompostu tama no sai, nunee Autoridade Munisipal bandu negosiante sira kalan toba iha merkadu hodi hein sasan, tanba atu destaka pesoal seguransa hodi asegura sasan iha tempu kalan, maibe la destaka pesoal seguransa no sasan negosiante sira nian kada tempu kalan sempre lakon.
Nia fundamenta, sasan neebe lakon iha negosiante sira nia baraka mak hanesan sapatu, roupa loja kompostu kalsa, faru no jaket inklui sasan nesesidade baziku sira.
“Lakon nee kada kalan, sasan neebe lakon iha nee liu US$ 1.500 nia folin ona, ami sente triste, tanba ami faan iha nee dala ruma ema la hola, mais naokten mai naok nafatin, nee ami rugi boot,” Crispin hateten.
Nia argumenta, negosiante sira neebe halo negosiu iha merkadu foun Tuanau, maioria asesu kreditu hafoin loke negosiu hodi hetan rendimentu sustenta ekonomia familia, maibe la hetan rendimentu iha kada loron no ema deskonhesidu kada kalan naok sasan hodi fo impaktu ba sira negosiu, tanba sasan neebe faan laos sosa husi kompradores sira, maibe naok husi ema deskonhesidu.
Nia informa, baraka neebe ema deskonhesidu tama hodi naok sasan hamutuk neen (6), nunee kazu refere parte negosiante vitima sira aprezenta ona keixa iha Komando Polisia Munisipiu Baukau hodi halo investigasaun klean.
Enkuantu negosiante Mateus Fernandes husu Autoridade Munisipiu Baukau atu destaka pesoal seguransa iha merkadu foun Tuanau, nunee bele kontrola sasan iha tempu kalan, tanba inisiu funsionamentu merkadu foun Tuanau, Autoridade Munisipal rasik bandu negosiante sira tempu kalan toba iha merkadu, tanba Autoridade Munisipal sei destaka pesoal seguransa, maibe too ohin loron laiha pesoal seguransa, neebe iha tempu kalan ema deskonhesidu aproveita naok negosiante sira nia sasan.
“Ami muda mai merkadu Tuanau tuir dezisaun Autoridade nian katak, mai ho seguransa neebe seguru, realidade seguransa laiha ema naokten aproveita sobu ami nia baraka naok ami nia sasan,” tenik Mateus.
Negosiante nee husu Autoridade Munisipal atu haree seriu asuntu refere, tanba durante funsionamentu merkadu refere, kuaze dalan barak ona ema deskonhesidu aproveita tempu kalan naok negosiante sira nia sasan, tanba kestaun la destaka seguransa.
Hatan ba kestaun nee, Diretor Servisu Jestaun Merkadu no Turizmu Munisipiu Baukau, Jeronimo Freitas hateten, kazu refere parte Jestaun Merkadu simu ona keixa husi negosiante sira, maibe seidauk bele fo komentariu ba publiku relasiona asuntu nee, tanba kazu refere seidauk aprezenta ba Autoridade Munisipiu Baukau neebe sei halo servisu seluk iha Dili.
Entretantu negosiante neebe faan iha merkadu foun Tuanau hamutuk 879 ho tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfaiate 14, faan sana rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba agrikultura nian 1, Farmasia 1, faan naan karau no seluk tan 10, faan ikan 23, produtu lokal 200 no mini restorante 7.
(tom)
