BAUKAU, STLTIMORLESTE.com – Ema deskonhesidu naok sasan no osan husi mini loja ida iha Aldeia Uatuasa, Suku Uatu-haco, Postu Administrativu Venilale, Munisipiu Baukau.
Nain ba mini loja, Evangelina da Costa Belo hatuir, iha loron 02 Maiu 2025 parte kalan iha Venilale anin no udan ho insentivu makaas, kauza eletrisidade mate, nunee komunidade sira inklui nain ba mini loja kuaze toba sedu no ema deskonhesidu sobu odamatan oin hodi tama foti sasan, osan mean no osan.
“Sasan hanesan sigaru ball, osan besik hau tau iha kofre ida hira hau ladun hatene, ho tan osan besi iha gaveta, ho tan osan tahan US$ 20.00 US$ 20.00 hau tau ketak, pulsa TT, Telemor, Telkomsel, hau nia osan mean korente 2, brinkus, kadeli kaben nian ho tan sasan rahun barak mak lakon,” informa Evangelina ba jornalista STL liu husi telefone, Sabadu (03/05/2025).
Sasan neebe lakon foti husi ema deskonhesidu mak hanesan sigaru ball husi sigaru Marlboro, LA, Surya no Pohon Jagu (joker fuma), inklui saldo ba telemovel hanesan saldo husi redi telekomunikasaun Timor Telekom, Telemor no Telkomsel. Aleinde nee mos sasan rahun seluk neebe faan nian.
Ema deskonhesidu laos naok nee deit, maibe naok mos osan besi sentavus rua nulu neebe kada loron rai hamutuk iha kofre ida, no osan tahan sira neebe rai hamutuk iha fatin segredu ida mos ema deskonhesidu naok hotu inklui ho osan besi balun iha gaveta loja nian. Aleinde nee mos naok osan mean hanesan brinkus no kadeli kazamentu.
“Sasan ho osan nee hamutuk hira mak lakon karik hau labele hatene, tanba korente ida deit hau hola US$ 600.00. osan sira nee hau la sura,” Evangelina konta ho tanis.
Sasan, osan no osan mean hirak nee lakon, iha momentu neebe nain Evangelina toba hela iha mini loja laran, maibe ema deskonhesidu sobu odamatan hodi naok nia labele hatene, tanba toba dukur.
Hafoin hader mai haree odamantan naksobu no haree sasan, osan no osan mean lakon ona, neebe naok husi ema deskonhesidu.
“Ami hatoo tiha ona ba polisia, maibe ema naok nee ita la kaer ho liman la haree ho matan ita duun deit ema moos ladun diak, ita bukti laiha,” hateten vitima Evangelina.
Asaun ema deskonhesidu sobu odamatan mini loja hodi naok sasan, osan no osan mean vitima Evangelina hatoo ona keixa ba polisia hodi prosesu.
(tom)
