BAUKAU, STLTIMORLESTE.com – Ema deskonhesidu soe bebe ida iha Aldeia Hohopo, Suku Hatolia Vila, Postu Administrativu Hatolia A, Munisipiu Ermera ho kondisaun mate, tanba asu han tiha ona nia isin lolon balun.
Informasaun nee hatoo husi Xefe Suku Hatolia Vila, Manuel Soares ba STL liu husi telefone, Kuarta (20/11/2024).
“Bebe nee hetan iha familia ida nia uma, kebetulang familia nee loraik ona atu tama ba tein kalan nian mak hetan bebe nee iha dapur laran, maibe nia inan nee deskonhesidu, ita seidauk bele hatene,” nia tenik.
Tuir informasaun husi Xefe Suku Hatolia katak, insidente refere hetan husi sidadaun mane ida ho naran Julino Martins iha neebe sidadaun refere hakat ba dapur iha tuku 06:00 loraik nee, atu tein hahan kalan nian, maibe derepente hetan bebe ida iha dapur laran.
Nia sublina, bebe neebe iha sidadaun refere nia dapur laran deskonfia ema deskonhesidu soe iha mota Biareti Hatolia liu ona loron ida, tanba iis ona, hafoin asu ida lori mai sidadaun refere nia hela fatin iha oras purvolta tuku 04 loraik, Kuarta (20/11/2024).
“Nia kelamin nee mak ita labele deskobre tanba asu han hotu tiha, maibe provizoriu iha fatin akontesimentu nee iha ona doutor no seguransa, hein forensik sira husi Dili,” nia akresenta.
Autoridade nee informa, kazu ema deskonhesidu soe vebe iha Suku refere akontese dala 3, husi tempu okupasaun Indonezia too Timor ukun aan.
Nunee Autoridade Suku hamutuk ho entidades relevante sira entrega tiha bebe refere ba forensik halo ezaminasaun, maibe Autoridade Suku mos sei orienta ba sidadaun feto sira iha Aldeia refere hodi akumula iha sentru hodi pesoal saude sira halo teste masal, tanba asaun nee krime.
(EST 2)
