BAUKAU, STLTIMORLESTE.com – Ema deskonhesidu sunu motorizada marka vixion ida iha Aldeia Basara-Uai, Suku Hae-Koni, Postu Administrativu Baguia, Munisipiu Baukau.
Xefe Suku Hae-Koni, Luís Oliveira esplika, kazu refere akontese iha loron 15 Abril 2025, parte tuku 04:00 madrugada, iha neebe komunidade sira sei toba no ema deskonhesidu aproveita sunu motorizada marka vizion pertense ba sidadaun Jaqueu Manuel de Oliveira neebe para hela iha varanda kios nian.
“Motor nee agora kondisaun la diak ona, Polisia sira mai haree ona no halo ona investigasaun ba motor nia nain,” hateten Luís iha Baguia ba jornalista STL liu husi telefone, Kuarta (16/04/2025)
Motorizada neebe ema deskonhesidu sunu para hela iha uma kios okos, maibe la afeta ba insendiu, tanba hafoin ema deskonhesidu sunu, mezmu vitima toba no hakfodak haree motorizada ahi han no tenta lori bee rega, maibe la konsege salva.
Motorizada refere kauza kondisaun aat, tanba parte instalasaun no asesoria seluk kuaze motuk, nunee vitima relata kedas ba Komando Polisia Eskuadra Postu Baguia hodi halo investigasaun ba vitima no vizinhu balun, tanba antes nee iha problema ba asuntu balun.
“Nee tenke buka tuir duni, tanba sunu ema nia motor. Motor nee agora sei iha uma, Polisia mai hasai deit foto,” Luís akresenta.
Lideransa Lokal Suku Hae-Koni nee husu Komando Polisia Munisipiu Baukau liu husi Polisia Eskuadra Postu Baguia atu buka tuir ema deskonhesidu neebe konsege sunu motorizada hodi prosesu tuir lei neebe eziste, tanba nee krimi.
Komadante Komando Polisia Nasional Timor Leste interinu, Superintendente João Sancho Pires argumentu, nia parte simu ona informasaun no orienta ona Polisia Eskuadra Postu Baguia atu halo investigasaun klean ba kazu refere liu husi kooperasaun ho Autoridade Postu no Suku.
“Informasaun katak ema sunu la. konhese, nunee ita orienta sira foti dadus nunee ita bele hasae ba Ministeiru Publiku, maibe ita buka nafatin autor neebe hakarak koko halo problema,” hateten João Sancho Pires.
Komandante nee deklara, bainhira prosesu investigasaun husi Polisia Eskuadra Postu Baguia remata no relata ba Komando Polisia Munisipiu Baukau, sei enkamina ba Ministeriu Publiku hodi foti desizaun.
(tom)
