BAUKAU, STLTIMORLESTE.com – Ema deskonhesidu nain 2 utiliza motor la ho sapa matrikula hodi rama ambon tiru joven nain 5 iha area Star Motor, Suku Tirilolo, Postu Baukau Vila, Munisipiu Baukau.
Jovem neebe hetan tiru husi grupu deskonhesidu José Agostinho Dias Marçal haktuir, asaun asaltu nee akontese iha loron 23 Setembru 2025 parte kalan, pur-volta tuku 11:35, bainhira nia ho maluk nain 3 tuur hela iha loja Loro Sae, derepende ema deskonhesidu nain rua utiliza motor Vixion la ho sapa matrikula diresaun husi area Lamegua no too iha fatin sira tur ba tenta tiru sira nain 4 ho rama ambon.
“Kronolojia kalan nee ami tur hela, iha nee nain 4 mak hetan asaltu husi grupu rama ambon dala rua nia diresaun husi Lamegua nian mai ema nain 2 too iha nee sira tiru rama ambon. Ho motor sapa matrikula laiha, primeiru ami tuur iha nee nia tiru entaun ami ba hatoo iha kantor posilia kolega ida tuur nonok iha nee mai tan dala ida nain 2 nafatin,” José konta iha Star Motor, Kinta (25/09/2025).
Nia sublina, asaun tiru rama ambon ba jovem sira iha area Star Motor dala rua akontese deit iha kalan ida, tanba tiru dahuluk ba jovem nain 4 akontese iha tuku 11:35, nunee sira ba hatoo keixa iha Polisia Eskuadra Postu Baukau Vila, maibe kolega ida seluk la hatene hodi tuur tan iha fatin nee hetan tan tiru iha tuku 11:40.
Maibe ema deskonhesidu nain 2 neebe ho motor laiha sapa matrikula tiru rama ambon ba sira la rezulta sira hetan kanek, tanba ema deskonhesidu refere tiru sira hetan hodi hases aan nunee rama ambon nee lakona sira.
“Sorte ses tanba rama ambon nee uza buat saka nia talin neebe haree kona neebe bele ses, se besi loos deit karik labele haree kona,” José akresenta.
Nia informa, asaun ema deskonhesidu utiliza rama ambon hodi tiru nee ema iha fulan Setembru nee akontese ona dala 3, tanba iha semana liu ba jovem ida hetan tiru ho rama ambon iha bairo Sentral Suku Bahu, Postu Baukau Vila neebe rezulta jovem refere hetan kanek no iha 23 Setembru kalan tiru dala 2 iha area Star Motor nian la rezulta ema kanek.
Nia sujere, asaun refere parte Komando Polisia Munisipiu Baukau tenke tau atensaun seriu, tanba akontese iha area Star Motor jovem sira ba hatoo kedas keixa iha pare Polisia Eskuadra Postu Baukau Vila, maibe laiha rezultadu, tanba seidauk halo identifikasaun ba sidadaun ruma.
Tanba nee husu Autoridade Seguransa atu kontinua servisu makaas nunee bele identidifika autor prinsipal ba asaun refere hodi submete ba prosesu investigasaun, tanba asaun neebe halo tenta atu estraga ema seluk nia vida.
Jornalista: Tomas Reis
Editora: Carme Ximenes
