DILI, STLTIMORLESTE.com – Ema deskonhesidu balu iha kalan boot tuku 00:00 Oras Timor Leste (OTL) ka Kuarta feira (01/01), uza arma tiru tama ba rezidensia eis Prezidente Republika, Francisco Guterres “Lu Olo”.
“Tebes duni, hori kalan iha tuku O0:00, tinan fahe malu, ema deskonhesidu aproveita fogetes nia tarutu, tiru kilat tama rezidênsia eis Prezidente Republika no Prezidente Partidu FRETILIN, Francisco Guterres Lú Olo ho intensaun atu oho nia,” haktuir nota komunikadu neebe STL asesu husi pajina Facebook Ofisial eis Prezidente Republika, Francisco Guterres “Lu Olo” iha Kuarta nee (01/01/2025).
Kilat musan (bala real) neebe tiru tama ba rezidensia eis Prezidente Republika, fura husi kalen uma tun too kona meza neebe babain eis titulares nee uza tio rahun hotu.
Tanba nee hafoin akontesimentu nee mosu, seguransa pesoal eis Prezidente Republika informa kedas ba Komando PNTL no F-FDTL, PCIC, PM, INTELIGENCIA MILITAR no POLICIA FORENSIC too kedas uma rezidensia hodi halo observasaun direita no halo investiga kona-ba faktu nebe akontese.
“Obrigadu ba imi nia profesionalizmu liu husi pratika neebe hatudu iha tempu neebe mosu perigu ba ema nia vida, iha biban ida nee hau fo hatene mos ba seguransa pesoal ba Titulares Orgaun Soberania nian ga Ex-titulares nian atu hola atensaun no fo seguransa diak ba ita nia nai ulun sira hotu-hotu. Obrigadu ba atensaun no kontinuasaun Boas Entradas Tinan Foun 2025 ba ita hotu,” haktuir pajina Facebook Ofisial nee.
Antes nee mos iha ona ema tiru kilat musan tama iha rezidensia eis Prezidente Republika no Partidu FRETILIN.
(alb)
