DÍLI, STLTIMORLESTE.com – Timor Leste (TL) iha horiseik no ohin hateke ho matan been ba lalehan. Notisias triste kona-ba Madre Maria Chioda FdCC, neebe fila ona ba Maromak kadunan, hamosu sentimentu lakon neebe klean, liu-liu ba komunidade kbiit laek no ema kiak sira neebe durante nee konsidera Madre hanesan sira nia inan no fuan domin.
Iha sidade Dili too foho leten sira, naran Madre Maria Chioda laos deit naran relijioza ida, maibe sai hanesan simbolu ba esperansa. Durante ninia misaun iha rai doben TL, Madre Chioda dedika ninia moris tomak hodi rona, hametin no fo han ba sira neebe mundu haluha ona.
“Ami sente hanesan lakon fali inan rasik, tanba Madre nunka husik ami mesak bainhira ami presiza kbiit, Madre mak inan neebe la kolia barak, maibe ninia domin too duni ami nia uma laran,”dehan inan kbiit laek ida ho naran, Jacinta Soares ba STL, Kinta (19/03/2029).
Ba Inan Jacinta no barak seluk, Madre Chioda mak sira nia belun diak liu, iha tempu neebe sira sente moris nee todan, Madre Chioda sempre mai ho oin midar, lori liafuan kbiit nian, no dalaruma lori mos hahan ruma hatutan moris.
Madre Maria Chioda husi Kongregasaun Filhas de Caridade Canossianas (FdCC) foin lalais nee remata ona ninia peregrinasaun iha mundu. Maski nunee, marka ain neebe Madre Chioda husik hela iha mundu karidade nian sei labele lakon husi memoria povu nian.
Tanba Madre Chioda mak figura ida neebe hatudu katak domin laos deit ho lia fuan, maibe ho asaun neebe konkretu ba ema hotu neebe presiza.
Iha momentu lutu nee, sarani ka povu Timor-Leste liuliu sira neebe Madre sempre tulun, halo orasaun hamutuk hodi husu ba Maromak atu simu Madre Maria Chioda iha ninia reinu.
Entretantu Madre Maria Chioda moris iha Italia iha loron 4 fulan Maiu tinan 1939 no remata ninia misaun boot iha rezidensia Madre Canossiana, Bekora, Dili, iha loron Kuarta (18/03/2026). Iha idade neebe besik 87, inan laran luak nee husik hela legadu domin neebe sei lalakon iha memoria maluk kbiit laek sira.
(car)
