BAUKAU, STLTIMORLESTE.com – Ema nain 2 hetan taa iha Aldeia Samalari, Suku Samalari, Postu Administrativu Baukau Vila, Munisipiu Baukau.
Familia vitima, Ana Rozalia Morreira esplika, insidente nee akontese iha loron 14 Outubru 2024 kalan, neebe vitima inisial S atu ba foti telefone iha tiu balun nia uma, derepente haree ema (vitima sira konhese) balun halo asaun ba vitima E nuudar S nia familia, nunee vitima S tenta salva E, maibe vitima nain 2, ida hetan kanek grave no nain ida kanek kmaan husi asaun taa.
“Ami familia sira ba haree katuas no alin nee monu. Ami familia sira ba salva mos labele, tanba ema balun kaer senter, fatuk no katana neebe ami tauk,” Rozalia haktuir ba jornalista sira iha HoREX Baukau, Tersa (15/10/2024).
Nia sublina, hafoin vitima S no E hetan taa, parte familia kontaktu kedas ba parte Polisia Baukau too kedas fatin, inklui ho ambulansia transporta vitima nain 2 ba Hospital Rejional Eduardo Ximenes Baukau hodi halo tratamentu.
Kanek neebe vitima nain 2 hetan husi taa mak, E liman loos kondisaun kmaan, enkuantu S hetan kanek grave iha parte ulun.
Familia vitima nee rekomenda ba parte seguransa buka tuir autor sira hodi prosesu tuir lei neebe vigora iha Timor Leste.
(EST 2)
