BAUKAU, STLTIMORLESTE.com – Ema nain 3 lakon vida husi asidente trafiku ho motor iha estrada publiku Lanud no kaisidu, Postu Administrativu Baukau Vila, Munisipiu Baukau.
Komadante Komando Polisia Munisipiu Baukau, Superintendente Polisia João Sancho Pires esplika, iha loron 13 Marsu 2026 parte kalan, Komando Polisia Munisipiu Baukau liu husi Polisia Tranzitu rejistu asindente trafiku iha fatin rua rezulta ema nain 3 lakon vida. Husi asidente refere ida iha estrada publiku Lanud Baukau involve husi motorizada Yamaha marka supiter MX kor azul sapa matrikula K.2369 konduz husi João Guterres idade 38 nuudar kalpinteiru diresaun husi Diwake ba Triloka no motorizada Honda marka mega pro kor metan sapa matrikula 2237.GA konduz husi Julio Soares Belo idade 40 mediku servisu iha Postu Saude Bukoli atu ba nia hela fatin iha Vila Nova Baukau, maibe too area lanud nian motor rua refere soke malu rezulta motorista nain 2 refere lakon vida, tanba hetan pankada makaas iha parte ulun.
No asidente ida seluk iha estrada publiku kaisidu involve husi motorizada Honda marka mio street kor meta sapa matrikula O.1743 konduz Gabriel Martins Pinto idade 25 diresaun husi Waisa deskonfia ho kondisaun lanu no motor laiha lampu nunee too iha area kaisidu halai sai husi estrada rezulta mate fatin, tanba hetan pankada makaas.
“Sidadaun nain 2 nee ida mate fatin, ida doutor nee lori hela mai mak too dalan mate, ema balu dehan kareta mak soke, maibe laos kareta motor rua nee mak hasoru malu i momentu nee abu abu makaas hela mosu hanesan nee, ida mos monu mesak mate iha kaisidu,” Komadante Komando Polisia Munisipiu Baukau, Superintendente Polisia João Sancho Pires informa ba STL iha Vila Nova Baukau, Segunda (16/03/2026).
Nia informa, kona-ba asidente iha Lanud rezulta ema nain 2 lakon vida mosu polemika katak soke husi kareta Carry ida, Komando Polisia liu husi tranzitu halao identifikasaun ba kareta neebe espalha iha media sosial, maibe laloos, tanba kareta neebe aprezenta antes kedas para iha ofisina ida iha Postu Administrativu Laleia, Munisipiu Manatuto halo munutensaun balu.
No identifikasaun seluk neebe ekipa tranzitu halao iha fatin akontese hetan, asindente nee involve direita husi motor 2 refere nebee rezulta motor 2 refere iha parte oin rahun.
“Ami husu hela ba familia sira se deit, mak haree ho matan duni mai keixa para ita lao, maibe realidade neebe iha motor ho motor mak soke malu, laos kareta mak soke,” Komadante nee rekomenda.
Entretantu motor 3 refere daudaun Polisia Tranzitu asegura ona iha edifisiu Komando Polisia Munisipiu Baukau hodi prosesu ba Ministeriu Publiku.
(tom)
