AMBENO, STLTIMORLESTE.com – Ema neebe la fiar metin, nia sei monu ba lasu, sei lao sala dalan, la hatene dalan atu ba neebe. Matan moris neon nain ho ema barak neebe sei mai doko rai. Maski sira doko rai, maibe tanba sira laos rai nee nia nain, entaun rai nee mak sei doko fali sira, rai nain babeur sira, rai nain selok sira, hodi doko sira tun sae.
Liu husi omilia, Pe. Florindo de Jesus nuudar Amo Vigariu Parokia Nossa Senhora do Rosario Oecusse, liu husi ninia omilia bainhira prezide misa eukaristia iha Igreja Tuan Santo Antonio Oecusse, Domingu (16/11/2025) katak, ohin tama ona ba iha Domingu XXXIII tempo bai-bain, tinan liturgia C nian.
“Liturgia Domingu ikus ka Domingu Penultimu nee nian, fo hanoin mai ita katak, tinan liturgico C nian, besik remata dau-daun ona no sei mosu tinan foun ida tan mai. Husi liturgia neebe ita iha, hatudu mai ita oin sa ita nia tempo moris, katak tempo ida remata, tempo seluk mai, tempo tuan remata, tempo foun hahu,” dehan Amo Vigariu Oecusse.
Nia dehan, husi tempo neebe lao ba nafatin, hanorin atu oinsa ita hatudu nafatin sarani sira nia fidelidade ba Maromak, laran metin ba Maromak iha tempo hotu-hotu.
“Nai Maromak futar liafuan Domingu ida nee nian koalia mai ita kona ba tempo ikus no husu ita atu hanoin, kona ba saida mak ita sei halo hodi hein tempo ikus neebe sei mai. Ita rona iha Primeira Leitura ohin, Profeta Malequias halo discurso eskatolojia kona ba buat neebe sei akontese iha tempo ikus hodi dehan nunee, loron sei too mai. Loron nee sei manas hanesan forno be ema tunu paun, ema loko aan sira, ema aat sira tomak sei sai hanesan duut maran. Loron ida be atu mai nee, sei habai maran sira, sira nia abut ka sira nia sanak ida mos sei la hela. Maibe, ba imi be hamtauk Hau naran, sei hetan salvasaun, maksoin ida sei mosu iha imi leet, Maksoin nee sei mosu husi justisa nia roman,” dehan Amo.
Nia hatutan, Oinsa mak atu hetan salvasaun iha loron ikus? Dalan mak rona iha Evangelho ohin.
“Jesus husu ba Nia eskolante sira nomos husu ba ita, atu keta naran fiar ema, keta husik ema lohi ita, basa ema barak sei mai hodi Jesus nia naran, dehan sira mak Messias, sira mak boot, sira mak diak liu, sira mak iha poder,” akresenta Amo Florindo liu husi Omilia.
Nia salienta, ema neebe la fiar metin, nia sei monu ba lasu, sei lao sala dalan, la hatene dalan atu ba neebe. Matan moris neon nain ho ema barak neebe sei mai doko rai. Maski sira doko rai, maibe tanba sira laos rai nee nia nain, entaun rai nee mak sei doko fali sira, rai nain babeur sira, rai nain selok sira, hodi doko sira tun sae. Nunee koalia mak barak maibe resultado nem halo buat ida, resultado zero Kortado, kaben nafurin hanesan sunami, maibe realidade nem halo buat ida. Sira doko rai dehan halo revolusaun, wainhira mosu revolusaun, sira halai tiha, depois de revolusaun, sira fila mai dehan sira mak aswain ba rai ida nee, ida nee mak dehan traidor loloos, maupagador loloos.
Ba Sao Lucas, ida nee dehan profeta falso loloos mak ema sira hanesan nee, gosta doko rai, kaan halo rai moris. Nai Jesus, husu eskolante sira atu hola atensaun hodi labele monu ba profeta falsu sira nia gaiyola. Nai Jesus mos hahu halo predisaun kona ba saida mak eskolante sira sei hasoru iha futuru. Nunee, Nai Jesus dehan ba Nia Apostolo sira katak, sei too nia tempo. “Povu ida nee sei hamriik funu hasoru povu seluk, Reino ida nee sei hamrik funu hasoru reino seluk, rai sei nakdoko makaas, iha fatin barak ema sei hamlaha, sinal boboot sei mosu mai, ema sei kaer imi, dadur imi, ema sei duni sai imi, sei lori imi ba sinagoga, sei hatama imi ba cadeia, ema sei dada imi ba liurai emboot sira oin tan Hau nia naran, maibe keta tauk, iha oras nee, Hau sei fo lia matenek ba imi atu koalia. Imi nia funu balun sira sei la tahan hasoru imi, imi nia familia sira mak sei saran imi ba ema aat sira liman, ema sei oho imi balun, ema hotu sei rai odio hasoru imi, tan Hau nia naran. Maibe, Jesus dehaan, “keta tauk, Hau sei hamutuk nafatin ho imi too mundo nee remata,” haktuir Amo.
Amo Vigariu hateten, Jesus nia liafuan neebe dehan daudaun nee sai realidade duni, depois de Jesus mate, moris hias no hiit aan sae ba lalehan, Apostolo sira hasoru duni ida nee, ema kaer sira, ema baku sira, ema duni sira sai husi Jerusalem, sira balun ema boot sira haruka tesi kotu sira nia kakorok tan deit Jesus nia naran.
“Maibe, eskolante sira la tauk, la hakiduk, lao nafatin ba oin, tan sira laran metin iha Jesus nia liafuan neebe dehan, Hau sei hamutuk nafatin ho imi too mundo nee remata. Jesus hamutuk nafatin ho ema neebe fiar metin iha Nia, Jesus nunka husik ema neebe buka nafatin Nia, Jesus hamutuk nafatin ho ema sira neebe kalan loron harohan nafatin ba Nia,” afirma Amo iha Omilia.
Mensajen husi maromak futar liafuan Domingu ida nee nian mak nee, nudar sarani, nudar ema fiar nain, mai buka.
“Tau ita nia fiar ba Jesus, hodi halao ita nia moris nudar sarani neebe loloos, sarani neebe la halai tun sae, la fiar buat oi-oin, maibe fiar iha Maromak mesak ida deit. Buat ida neebe ita keta haluha ita nia moris mak nee nee, katak maski ita moris iha mundo, maibe ita moris laos atu duni moris mundo nee nian, maibe ita moris atu duni moris rohan laek,” akresenta Amo Florindo.
Amo hatutan, ema neebe preokupa ho moris rohan laek, nia sei tau laran ba lalehan, ema neebe buka mak moris mundo nian, sei tau laran deit ba riku soin mundu nian hodi la hanoin kona Maromak, Domingu la mehi Maromak, Domingu la tama Igreja, la konfesa, la komungga, ikus mai mate, klamar la hetan bensaun, la hetan salvasaun.
“Nudar mensajen husi Maromak futar liafuan loron ida nee nian ba ita mak nee, Jesus ohin fo garantia/jaminan ba nia Apostolo sira nomos fo garantia ba ita sira neebe fiar iha Nia, katak ema neebe fiar iha Jesus, aban bairua mate, sei hetan moris rohan laek iha lalehan. Kristo nia liafuan neebe ita rona nafatin iha Evangelho mak sei sai sasin ba ita ida-idak nia moris no sai nudar dalan no naroman neebe sei lori ita ba hetan moris rohan laek iha lalehan. Mai, ita buka fiel nafatin ba Jesus ida neebe terus, mate no moris hias tanba ita. Nunee deit mak ita sei hetan moris hias hamutuk ho Jesus iha loron ikus, hodi tama ba moris rohan laek neebe Jesus rasik prepara ba ita ida-idak ita tempo ikus.
Jornalista: Joseph Koa
Editor: Joseph Koa
