BAUKAU, STLTIMORLESTE.com – Ema hamutuk rihun 3 resin iha Munisipiu Baukau envolve ka partisipa iha kooperativa kreditu uniaun no multisektorial, ho kapital rihun US$ 10 resin.
Koordenador Sekretariu Estadu Kooperativa (SEKoop) destakadu Munisipiu Baukau, Domingos da Graça Silva Ximenes esplika, total kooperativa neebe dadaun eziste iha Munisipiu Baukau hamutuk 20, kompostu tipu kooperativa kreditu uniaun 15 no kooperativa multisektorial 5 neebe rejistu iha Postu Administrativu Baukau Vila 7, Baguai 2, Laga 2, Kelikai 2, Venilale 1 inklui Vemasi 6 ho total membru rihun 3 resin involve husi feto nain 1.734 no mane 1.757.
“Atual iha membru 3.491 nee husi 20 kooperativa nebee iha kompostu feto mane nia numeru partisipasaun, agora total kapital neebe investe sirkulamentu lao hela nee hamutuk US$ 10.726.603,02,” informa Domingos ba STL, iha knaar fatin Tirilolo, Baukau, Sesta (22/08/2025).
Nia sublina, valor orsamentu refere mai husi membru kooperativa no objetivu investe ba rai no empresta, tanba nee SEKoop fo asistensia teknika liu husi motivasaun, sensebelizasaun no regulariza kooperativa sira ba dalan legal tuir dekretu lei Nu 16/2004 neebe altera daruak ba Nu 37/2023.
Tanba sidadaun neebe envolve iha kooperativa bele ona muda mentalidade moris nian, tanba liu husi investimentu neebe sira iha, fasil ba sira halo mudansa liu-liu asesu ba kreditu hodi responde nesesidade familia nian.
“Iha sosiedade ita hetan baibain ema hanaran oklu kooperativa katak, sira la tama kooperativa sente difisil liu liu asesu kreditu, mais sira tama vantajem ba sira fasil kreditu,” Domingos akresenta.
Esforsu Diresaun SEKoop Munisipiu Baukau nian atu aumenta numeru kooperativa mak, Koordenador nee hateten, iha IX Governasaun ba servisu kooperativa nian koko konvense komunidade sira ba asuntu harii kooperativa nian, tanba maioria Komunidade sente fasil harii kooperativa ida, maibe harii kooperativa ida nee difisil.
Nunee SEKoop sei fasilita ba komunidade sira neebe hakarak kooperativa, maibe komunidade tenke forma grupu hafoin SEKoop fasilita transforma grupu sai kooperativa.
“Inisiativa husi grupu mak sai prioridade ba dezenvolvimentu, tanba dadaun ajensia barak mak fila husi Timor husik hela sira nia kontribusaun mak atu motiva liu tan diak liu grupu sira neebe iha liu husi SEKoop bele transforma ba kooperativa,” Domingos sujere
Koordenador nee katak, ajensia internasional sira neebe durante iha Timor Leste barak forma ona grupu neebe involve husi Timor oan sira, maibe realidade hatudu grupu barak taka, tanba garantia deit ba ajensia internasional sira nia apoiu.
Nunee husu grupu sira neebe harii husi ajensia internasional sira dadaun karik sei eziste liu lui iha Munisipiu Baukau, tenke mantein no hakbesik aan ba SEKoop hodi transforma ba kooperativa hodi kontribui ba dezenvolvimentu iha Timor Leste liu liu iha Munisipiu Baukau.
(tom)
