DILI, STLTIMORLESTE.com – Ema tenke sensivel ba Maromak nia lian, presiza arepende sala neebe halo hodi fila ba dalan loos tuir Jesus nia hanorin.
Lia hirak nee hatoo husi Padre Richardo Pasang, SVD liu husi nia refleksaun ba loron Kinta (07/11/2023), Semana XXXI do tempo komum Flp. 3 : 3 – 8 Luc. 15 : 1 – 10.
“Se ita lee istoria iha Biblia Sagrada, ita sei kompreende no konsiente katak Maromak sempre hadomi Nia povu no hakarak povu sira hetan salvasaun. Maromak la kastigu Nia povu wainhira monu ba sala maibe ho miserikordia Nia fo perdaun no haraik tulun atu sira arepende no fila fali ba dalan Maromak nian,” dehan Padre Richardo.
Padre Richardo dehan, obra Maromak nian atu salva ema tomak husi sala neebe harahun relasaun ho Maromak, realiza loloos wainhira Jesus Kristu mai iha ema nia leet. Iha ninia obra, Jesus Kristu tau atensaun liu-liu ba ema maksalak sira no hakarak atu sira bele nakfilak aan.
“Jesus dehan iha Evangelhu ohin loron haksolok ho hau ba, basa hau hetan fali ona hau nia bibi neebe lakon. Hau dehan ba imi katak iha lalehan sei haksolok tanba ema maksalak ida neebe hakribi nia sala, liu fali ema diak sianulu resin sia neebe la kuran atu hakribi sala.” katak Padre nee.
Bibi Atan kreda katolika nee haktuir, nuudar sarani presiza Sensivel no rona Maromak nia liafuan sira, no presiza arepende sala hodi fila ba dalan los.
“Ita tenke sensivel hodi rona Maromak nia lian neebe bolu ita atu arrepende hodi fila fali ba dalan los Maromak nian. Dala ruma, Nia lian bolu liu husi maluk neebe moris haleu ita, dala ruma, Nia lian bolu liu husi esperensia ksolok no terus neebe ita hasoru dala ruma, Nia lian bolu liu akotesimento natureza neebe halo ita tauk. No sei iha maneira barak nebe Maromak uza atu ita bele sai mos ema neebe hetan salvasaun,” dehan nia.
Nia dehan, ema tenke sensivel ba lian bolu Maromak nian atu sai Nia mensanjeiru atu bele bolu mos ema seluk ba arependimentu.
“Dala barak, akontese, ita nia presensa, komprimenta malu, hamnasa malu, mos fo hanoin malu no rona ema seluk sai momentu nakonu ho grasa ba ema neebe ita hasoru. Nee duni, Maromak hakarak atu ita sai ema neebe lori arependimentu, lori salvasaun ba ema seluk. Nai Maromak, haraik Ita biit atu harii hahalok arependimento iha moris atu bele hamutuk ho Ita nia Gloria Amen,” hatete Padre nee.
(eme)
