DILI, STLTIMORLESTE.com – Embaixada Japaun fo suportasaun ba Governu Timor Leste (TL), liu-liu aloka orsamentu ho montante rihun US$ 6, hodi halo konstrusaun ba edifisiu foun Radio Televisaun Timor Leste, Emprejariu Publiku (RTTL, E.P) ho medida andar 4 iha area Kaikoli.
“Ita fo apoiu ba RTTL, E.P, nunee bele sai media neebe importante ba povu Timoroan hotu, no bele sai radio vizual ida neebe inkluzivu, hodi fo informasaun neebe kredivel no efetivu iha futuru TL nian,” dehan Embaixador Japaun iha Timor Leste (TL), Tetsuya Kimura ba jornalista sira iha Kaikoli, Segunda (25/11/2024).
Tuir Embaixador Japaun, apoiu neebe Governu Japaun fo ba Governu TL liu husi Sekretariu Estadu Komunikasaun Sosial (SECOMS), oinsa bele organiza programa konstrusaun nee ho diak.
Tanba nee, husi konstrusaun ba edifisiu foun RTTL, E.P nian, tuir kontratu Governu fo oportunidade ona ba Kompanhia internasional 1 no nasional 3, hamutuk 4, nunee bele haree katak kompanhia neebe iha kapasidade sufisiente hodi halo konstrusaun nee ho diak, kualidade ba longu prazu nian.
Entretantu Sekretariu Estadu Komunikasaun Social (SECOMS), Expedito Dias Ximenes afirma, Embaixada Japaun hamutuk ho UNDP no Governu liu husi SECOMS, halo programa ida nee (Board Meeting Project), oinsa bele halo konstrusaun ba edifisiu foun RTTL, E.P nian iha Kaikoli.
Konstrusaun refere hetan apoiu husi Embaixada Japaun, ho montante orsamentu rihun US$ 6, nee utiliza ba konstrusaun refere, tanba nee mak ohin aprezentasaun sira lao estavel, no atu halao fali prosesu ba konstrusaun nian.
Iha fatin hanesan, Presidente RTTL, E.P, Jose Antonio Belo hatete, konstrusaun ba edifisiu foun RTTL, E.P sei tau fatuk dahuluk iha loron 19 Dezembru 2024, neebe tuir kriteria sei finaliza iha fulan Marsu 2026.
(EST 1)
