LIKISA, STLTIMORLESTE.com – Governu Japaun reforsa ona importansia atu hametin setor komunikasaun sosial, no fo apoiu ba dezenvolvimentu jornal iha Timor Leste, nuudar parte ida husi kompromisu neebe luan liu atu hametin prosesu demokratiku sira.
Relasiona ho formasaun Governu liu husi Sekretariu Estadu Komunikasaun Sosial (SECOMS), neebe programiza formasaun husi Konselhu Imprensa (KI) ba jornalista sira, husi Embaixada Japaun entuziasmu fo suporta ba formasaun sira iha Timor Leste.
Embaixador Japaun, Tetsuya KIMURA hatete, jornalizmu hamriik iha demokrasia nia laran, tanba nee liu husi meiu komunikasaun sosial sira mak sistema atu halo sira nia dever nee metin, no sira nia akuntabilidade demokratiku hetan apoiu.
“Iha relasaun ho formasaun sira Governu Japaun reforsa ona importansia atu hametin setor komunikasaun sosial no fo apoiu ba dezenvolvimentu jornal iha Timor Leste, nuudar parte ida husi kompromisu neebe luan liu atu hametin prosesu demokratiku sira,” dehan Embaixada Japaun ba jornalista sira iha Likisa, Segunda (09/12/2024).
Nia dehan, apoiu neebe fo ba Governu TL lao iha formasaun sira deit, maibe liu husi kontestu inisiativa apoiu eleisaun nian, tanba nasaun Japaun mos haruka nia sidadaun Shinichiro Manjo no Chie Komikado, sai voluntariu Japaun sira, la iha asistensia atu kria no hadia programa oin-oin iha RTTL, nunee embaixada Japaun, IIC A, no ONG Japaun sira, kontinua servisu hodi fornese konteudu oin-oin no valor neebe serve ba povu Timor Leste.
“Ita nia planu fo apoiu harii ba Governu atu halo konstrusaun ba edifisiu foun RTTL, E.P ho montante orsamentu US$ 6 milhaun neebe implementa husi PNUD, signifikativamente infraestrutura no kapasidade operasional no haforsa kapasidade jornalista Timoroan sira nian, ho foku partikular ba kapasitasaun juventude no feto sira,” nia afirma.
Sekretariu Estadu Komunikasaun Sosial (SECOMS), Expedito Dias Ximenes hatete, Governu Timor Leste agradese ba Governu Japaun neebe durante nee sempre apoia Timor Leste, tanba Japaun mos mai ho apoiu ida atu harii edifisiu foun ba RTTL,EP neebe sei kompleta mos ho estudiu no sentru formasaun ba funsionariu RTTL, EP sira atu hetan formasaun no bele halao sira nian servisu ho fleksivel liu iha 2026 hafoin finaliza konstrusaun.
Tanba nee esperansa katak sentru formasaun nee sei ajuda jornalista sira iha RTTL atu bele hetan nafatin formasaun ho modelu reportajen investigativu, nune’e bele garante liberdade espresaun iha Timor Leste.
(EST 1)
