LIKISA, STLTIMORLESTE.com – Embaixada Malazia iha Timor Leste (TL) instala tanki bee ho litru 1.200 ba Eskola Baziku Filial (EBF) numeru 1-2 Pilaparia, iha Munisipiu Likisa, ho objetivu atu fo fasilita diak ba estudante sira, hodi moris ho kondisaun saudavel.
“Ita instala tanki bee ho litru neebe volume altu oituan ba estudante sira iha eskola Pilaparia, ho estudante kuaze nain 100, ho objetivu atu nesesita ba sira nia nesesidade, hanesan uza ba tein, fase liman, no kondisaun sira hotu, nunee bele moris kondisaun saudavel,” dehan Embaixador Malazia iha Timor Leste, Dato’ Amarjit Sarjit Singh ba jornalista sira iha Likisa, Sesta (22/11/2024).
Tuir Embaixador nee, apoiu neebe fo ba eskola EBF 1-2 Pilaparia, hanesan inisiativa responsabilidade sosial emprezarial no hodi apoia esforsu sira atu promove pratika saneamentu diak.
Entretantu Diretor Eskola EBF 1-2 Pilaparia Likisa, Domingos Ribeiro agradese tebes hodi simu apoiu neebe Embaixada Malazia fo hanesan instala tanki bee ho litru 1,200 iha eskola refere.
Tanba nee instalasaun bee nee ohin Embaixada Malazia handing-over ba eskola Pilaparia, ho objetivu ida atu ajuda ba komunidade, liu-liu ba estudante sira neebe eskola iha area refere atu bele utiliza bee nee ho diak.
(EST 1)
