DILI, STLTIMORLESTE.com – Iha loron 29 Outubru tinan nee, Embaixada Real Tailândia organiza atividade voluntariu hodi komemora loron memorial sua majestade Liurai Boot Bhumibol Adulyadej no loron Memorial Sua Majestade Liurai Chulalongkorn, tanba nee Embaixada Tailandia apoiu sasan esensial ba inan feton ho labarik sira neebe iha Casa Vida no Fundasaun Alola nian.
“Ita organiza atividade voluntariu hodi komemora Loron Memorial 2 nee iha loron 13 Outubru 2024 no loron 23 Outubru tinan nee, hodi fo doasaun sasan esensial ba inan feton ho labarik sira iha Casa Vida no Fundasaun Alola, nuudar organizasaun sosiedade sivil Timor nian neebe fo protesaun, restaurasaun no empoderamentu ba feto foinsae no labarik sira vítima husi violensia bazeia ba jeneru,” hatete Embaixadór Tailândia iha Timor-Leste, Atipat Rojanapaibulya ba jornalista sira iha salaun Alola, Tersa (29/10/2024).
Nia informa, Embaixada Tailandia servisu hamutuk ho Fundasaun Alola tinan 10 resin ona, no agora apoiu tan sasan esensial ba inan feton ho labarik sira iha Casa Vida no Fundasaun Alola.
Iha fatin hanesan, Diretora Ezekutiva Fundasaun Alola (FA), Maria Imaculada Guterres esplika, Embaixada Tailandia iha TL komemora loron memorial Sua Majestade Liurai Boot Bhumibol Adulyadej no Memorial Sua Majestade Liurai Chulalongkorn, tanba nee sira fo apoiu sasan esensial ba Fundasaun Alola atu fo ba feto no labarik feto sira neebe presiza.
“Tanba baibain ami atende ba vitima violensia bazeia ba jeneru sira, liu -liu ba feto sira, tanba sira mos presiza loos sasan esensial sira hanesan nee, entaun ida nee apoiu ami hodi fahe sasan sira nee ba sira,” nia informa.
Nia deklara, tanba Fundasaun Alola mos iha Sentru akonselamentu ba vitima sira, fulan-fulan vitima sira mai, depois sira mos bele fo apoiu sasan esensial ba vitima sira neebe presiza.
(jen)
