DILI, STLTIMORLESTE.com – Embaixada Xina iha Timor Leste apoiu fasilidade servisu ba media Suara Timor Lorosae Corporation (STL CORP).
Fasilidade servisu neebe Embaixada Xina apoiu mak hanesan telefone ho marka Oppo 5, Laptop MacBook 1, Laptop ho marka Lennovo 1, komputador 1, inklui Printer 1.
Iha intervensaun, Manajer Finansas STL CORP, Florencio de Oliveira lori CEO STL CORP no funsionariu nia naran hatoo obrigadu barak ba Embaixada Xina, tanba bele apoiu ona fasilidade servisu ba media STL CORP.
“Lori CEO STL CORP nia naran hakarak hatoo agradese wain ba Embaixada Xina, tanba bele fo atensaun ba media sira iha Timor Leste, liu-liu ba media STL CORP,” hatete Manager Finansas STL CORP, Florencio de Oliveira iha salaun enkontru STL, Tersa (18/02/2025).
Nia hatutan, STL CORP la haree ba kuantidade fasilidade servisu neebe Embaixada Xina apoiu, maibe haree ba sentidu neebe Embaixada Xina iha hakarak apoiu media sira iha Timor Leste.
“Ami La haree ninia kuantidade, maibe ami haree liu ba ninia sentidu, neebe ami agradese no ba oin STL CORP ho embaixada bele hametin liu servisu hamutuk entre Embaixada Xina ho media STL CORP,” dehan Manajer Finansas nee.
Nia akresenta liu tan katak, liu husi apoiu neebe Embaixada Xina fo, ba oin bele hametin liu tan servisu hamutuk entre media STL CORP ho Embaixada Xina.
“Ohin promete ona katak ba oin sei loke luan tan espasu ba servisu hamutuk, liu-liu fasilita formasaun ba jornalista sira, maibe funsionariu sira iha bisnis nee presiza formasaun neebe diak, tanba ba ami, ami sente katak rekursu umanu ba ami nee importante tebes oinsa bele halo jestaun ba iha ami nia atividade ba oin,” tenik nia.
Iha fatin hanesan, Embaixada Xina iha Timor Leste liu husi Director of the Political Section, Bu Tiantian katak, fasilidade servisu neebe Embaixada Xina apoiu nee bele fasilita servisu funsionariu STL CORP ho diak liu tan.
“Ami espera ekipamentu neebe ami fo bele apoiu servisu funsionariu sira nian ho diak liu tan, liu husi servisu neebe iha STL halo, Timoroan sira bele konhese liu tan Xina,” katak Director of the Political Section nee.
(alb/eme)
