DILI, STLTIMORLESTE.com – Embaixada Republika Popular Xina iha Timor Leste ho Komando Polisia Nasional Timor Leste (PNTL) realiza reuniaun daruak, hodi diskuti kona-ba reforsa kooperasaun no proteje direitus lejitimu empreza Xina no komunidade Xina iha Timor Leste.
Embaixadora Xina iha Timor Leste, Wang Wenli hatete, objetivu husi enkontru ho Komandante Jeral PNTL, Komisariu Jeral Henrique da Costa inklui ofisial PNTL husi sede no distritu, inklui reprezentante instituisaun Xina, no komunidade Xina mak atu diskute kona-ba haforsa kooperasaun no aumenta seguransa ba empreza no sidadaun Xina iha Timor Leste.
“Dezde mekanizmu tripartidu nee estabelese tinan kotuk, progresu signifikante hetan hodi hadia komunikasaun entre polisia no komunidade proteje seguransa empreza Xina no komunidade Xina,” hatete Wang Wenli ba jornalista sira iha Salaun enkontru Embaixada Xina, Ai-tarak Laran, Dili, Tersa (25/02/2025).
Nia hatutan, rezultadu pratiku sira nee reflete Timor Leste nia kompromisu atu hadiak relasaun bilateral no PNTL nia esforsu neebe la para atu mantein estabilidade sosial no seguransa públiku neebe Xina apresia tebes.
“Xina prontu atu hadia mekanizmu tripartidu liu husi estabelese plataforma komunikasaun regular, hadia protokolu resposta emerjensia, nomeia pontu kontaktu permanente, forma ekipa voluntariu tradutor, no enkoraja empreza no ema privadu atu aumenta konsiensia seguransa liu husi treinamentu regular,” dehan nia.
(alb)
