DILI, STLTIMORLESTE.co — Embaixador Brunei Darussalam iha Timor Leste (TL), Wan Hadfi Lutfan halao despedida ho Primeiru Ministru (PM), Kay Rala Xanana Gusmão, iha Palasiu Governu, Sesta (30/05/2025).
Iha ambitu despedida nee Embaixador Wan Hadfi Lutfan rekonhese katak, durante mandatu iha tinan tolu ikus, konsege dezenvolve kooperasaun iha setor saude, edukasaun, industria petroleu no gas ho konetividade Aerea.
Nia dehan, Kooperasaun sira neebe metin tebes no oras nee lao hela, konta mos ho vizita nivel aas husi vizita Estadu, Sua Majestade Sultan Brunei Darussalam, Hassanal Bolkiah Muiz’zaddin Wad’daulah mai TL iha tinan 2024.
Iha biban nee mos Embaixador Brunei, kongratula TL neebe sei sai membru plenu ba ASEAN iha Fulan Outobru tinan nee nia rohan.
“Hau hakarak atu kongratula TL neebe sei hola parte hanesan familia ASEAN nian iha fulan Outubru tinan nee bazeia ba desizaun lider sira iha Simeira ASEAN ba dala-46 iha Kuala Lumpur. Susesu ba TL,” nia kongratula.
Iha oportunidade nee, Primeiru Ministru (PM), Kay Rala Xanana Gusmão agradese ba dedikasaun husi Embaixador Lutfan hodi hametin relasaun TL ho Brunei Darussalam no dezeja susesu iha futuru.
Embaixador Lutfan hahi halao knaar iha TL iha fulan Junhu tinan 2022 no fila hikas ba Brunei Darussalam atu halao fali misaun seluk.
(jos)
