DILI, STLTIMORLESTE.com – Embaixador Canada, Jess Dutton vizita Ministeriu Defeza, hodi hametin diak liu tan kooperasaun no sei implementa sira nia programa formasaun ba militar sira nomos area sira seluk, para hametin liu tan kooperasaun Canada ho Timor Leste.
Ministru Defeza (MD), Kontra Almirante Donanciano da Costa Gomes “Pedro Klamar Fuik” dehan, Canada pais neebe amigo ho TL desde 1999, iha tempu neeba Canada haruka batelaun ida 60 militar husi Canada mai serve iha TL. Embaixador Canada, Jess Dutton mai vizita TL para atu koalia konaba asuntu defeza koperasaun nian.
“Ita hotu hatene uluk Canada nia militar mai serve iha ita nian rain, espesifikamente sira serve iha Suai, entaun sira nia esperensia ho ita, no sira nia akompanamentu ba iha ita nia dezentendementu sira haree katak importante no iha progreseu barak, i sira hakarak relasaun ida nee diak nafatin ho TL liu-liu iha area defeza nian,” dehan nia ba jornalista sira wanhira hasoru malu ho Embaixador Canada iha Kuartel Jeneral F-FDTL Fatuhada, Dili, Tersa (02/12/2025).
Nia informa, 2008 Canada estabelese programa treinu militar ida neebe halo mos ho TL. Simu timor oan sira ba tuir formasaun iha area barak hanesan mos area espesialidade no formasaun seluk tan.
“Ba oin ita sei haree tan área saida mak sira sei bele prepara para depois bele estabelese no hametin liu tan koperasaun entre Canada ho TL,” nia koalia.
Iha fatin hanesan Embaixador husi Canada, Jess Dutton ohin mai vizita Ministeriu Defesa (MD), koalia konaba koperasaun entre TL ho Canada, liu-liu ba area defeza nian.
Jornalista: Jeniche da Costa
Editora: Domingas Gomes
