DILI, STLTIMORLESTE.com – Embaixador Estraordinariu no Plenipotensiariu foun Republika Portugal nian ba Timor Leste (TL), Duarte Fale Costa de Bue Alves, iha loron Segunda nee (29/09/2025) aprezenta aan ba Xefe Governu, Kay Rala Xanana Gusmão, iha Palasiu Governu, nuudar Embaixador foun kompromisu atu kontinua kooperasaun neebe estabelese ona entre Portugal ho TL durante mandatu.
“Hau mak embaixador Portugal foun iha TL ohin mai aprezenta hau nia aan no troka impresaun uitoan. Ita sei kontinua halo diskusaun hodi aborda topiku oi-oin, maibe atu dehan buat neebe halibur ita nuudar estadu membru Comunidade dos Paises de Lingua Portuguesa mak presizamente lian Portuges,” dehan Embaixador Portugal foun ba TL, Duarte Fale Costa de Bue Alves ba jornalista sira hafoin hasoru Xefe Governu iha Palasiu Governu Dili, Segunda (29/09/2025).
Embaixador foun nee konsidera Comunidade Pais Lingua Portugal (CPLP) liga ho kestaun lian komun ida no tasi, neebe sai mos elementu komun fundamental. Ida nee esensial ba nasaun membru CPLP hotu. Iha TL, Governu tau importansia boot ba kestaun sira iha Ekonomia Azul hanesan buat neebe nia haree panfletu barak mak monta iha sidade laran tomak, hodi reflete prosesu konsultasaun publika kona ba estratejia Ekonomia Azul nian.
Nia dehan, ho Xefe Governu mos diskute kona ba oportunidade, difikuldade no dezafiu sira husi ekonomia sira neebe dezenvolve hela no oinsa bele servisu hamutuk iha area ida nee.
Nia akresenta, projetu neebe lao ho susesu tebes mak kestaun edukasaun nian, sei kontinua servisu makaas iha area nee, atu fo formasaun ba professor sira, biblioteka no kestaun lian Portuges, inklui kontinua servisu iha area Lei, justisa no lejislasaun.
Embaixador Duarte Alves nuudar diplomata distintu ida ho karreira ida neebe dura liu dekada rua dezde tama iha Ministeriu Negosiu Estranjeiru Portugal nian iha tinan 1999.
Ninia esperiensia diplomatika internasional neebe estensivu inklui destakamentu sira iha embaixada portuges nian iha Luanda, Bruxelas no Tokyo nomos nuudar Adjuntu Reprezentante Permanente iha OECD Paris.
Iha Lisboa, Embaixador Alves asumi ona pozisaun asesoria superior sira neebe signifikativu iha Governu nia laran.
Molok hetan nomeasaun mai TL, Embaixador Alves halao knaar nuudar Konsul Jeral Portugal nian iha Manchester dezde Setembru 2021. Embaixador Duarte Alves fluente iha lian Portuges, Ingles, Franses no Italianu.
Relasaun bilateral entre TL no Portugal nuudar parseria ida neebe profunda no multifasetadu, neebe metin iha istoria, lian no kultura neebe fahe malu.
Ligasaun ida nee reforsa liu husi akordu bilateral 77 no programa kooperasaun estratejika ida neebe ativu dezde 2011.
Portugal nia apoiu indispensavel iha seitor kritiku sira hanesan edukasaun, justisa no defeza, kombina ho dialogu politiku nivel altu neebe konsistente, halo parseiru internasional TL nian ida neebe vital no duravel liu.
Jornalista: Joseph Koa
Editor: Joseph Koa
