DILI, STLTIMORLESTE.com – Embaixador Republika Indonezia iha Timor Leste, Okto Dorinus Manik ho nia espoza Flantina Sari Mutiara Silalahi hamutuk ho Xefe Gembala Gereja ROCK Timor Leste, Pendeta Binsar Simangunsong, MTh ho sarani sira husi Igreja ROCK halao natal hamutuk ho tema “Wonderful Konselor” ka Konselor furak.
Natal hamutuk neebe marka prezensa husi Xefe Komunidade Batak Diak Los, Robert Pangaribuan, General Manager Banku Mandiri, Hari Nugroho Sujiono, Adidu Defesa iha KBRI Dili, Koronel (Arm) Hengky Sweeto Parsaoran, Adidu Polisia Republika Indonezia iha KBRI Dili, Komisariu Polisia, Kurniawan Hartono, Diretora Jacinto Group, Claricia Lay no konvidadus sira seluk halao iha Salaun Igreja ROCK Akadiruhun, Dili, Domingu kalan (14/12/2025).
Serimonia natal hamutuk ho sunu lilin natal nian nee hahu ho kanta knananuk furak ba Maromak iha ambiente Natál nian hanesan “Hai Mari Berhimpun, Yesus Jalan Kebenaran, O Praise The Name, no Dia Lahir Untuk Kami” partisipa husi sarani kuaze atus lima resin. Natal hamutuk nee lao ho paz no dame nia laran.
Embaixador Indonezia iha Timor Leste, Okto Dorinus Manik iha nia mensajen Natal nian hatete Natal mak tempu ida atu reflete kona-ba valór espirituál sira no hametin fiar, no mós reza ba bensaun sira neebé simu iha tinan tomak.
“Natal la’ós de’it selebrasaun ida, maibé mós tempu ida atu reflete kona-ba valór espirituál sira no fiar sarani nian. Natal lori esperansa foun tanba Jesus nia moris lori mensajen ida esperansa no dame nian, oferese dalan ida atu sai hosi susar,” dehan Embaixador Okto Dorinus Manik.
Diplomata senior Indonezia nee haktuir katak ba nia Natál hamutuk iha Igreja ROCK ba dala ikus nian tanba nia kna’ar nuudar Embaixador Indonezia iha Timor Leste remata tiha ona. Tanba nee, Embaixador Okto Dorinus Manik hatoo agradese ba apoiu tomak no servisu hamutuk durante nia mandatu tinan hat iha Timor Leste.
Entretantu, Gembala Igreja ROCK iha Timor Leste, Binsar Simangunsong, MTh, iha ninia mensajen Natal tinan 2025 nian dehan katak selebra Natal tinan ida nee ho ksolok no selebra Natal tinan ida nee ho tema “Honderful Konselor” signifika katak iha konselor furak ida neebe sepre tulun sarani sira bainhira hetan susar.
Nia mos husu ba sarani sira lee beibeik biblia atu hatene saida mak maromak hato’o ba sarani sira iha bibilia nee no maromak konvida sarani sira atu hametin nafatin fiar maromak.
“Hau nia esperansa ba Natal tinan oin mak Igreja ROCK sei sai bensaun ba ema barak iha Timor Leste,” nia hatete.
Serimonia Natal hamutuk nee remata ho jantar hamutuk, fahe sertifikadu no fahe prezente ba sira neebe kona nomeru doorprize.
Jornalista: Mikael Mali Mau
Editor: Mikael Mali Mau
