DILI, STLTIMORLESTE.com – Embaixador Japaun iha Timor Leste (TL) hatoo kongratulasaun ba TL neebe sei adere ba Asosiasaun Nasaun Sudeste Aziatiku (ASEAN) iha fulan Outubru.
Embaixador Japaun mai Timor Leste, KIMURA Tetsuya hatoo kestaun nee ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Segunda lokraik (16/06/2025).
Embaixador Japaun ba Timor Leste reafirma Japaun nia kompromisu firme mai dezenvolvimentu nasional no ho prosesu ba adezaun tomak ba ASEAN.
“Hatoo kongratulasaun ba Timor Leste neebe sei adere ba ASEAN iha fulan Outubru tinan ida nee, dala ida tan hatoo kongratulasaun,” dehan Embaixador Japaun mai Timor Leste, Kimura.
Embaixador Kimura mos hatoo parabens ba Timor Leste tanba progresu neebe mak halo atu sai membru kompletu iha ASEAN. Prezidente hatoo sinseru rekonhesimentu boot ba apoiu kontinuadu husi Japaun iha nível internasional no ba kontribuisaun tanjível ba dezenvolvimentu infraestrutura no ekonomia nasional.
Iha enkontru nee, Xefe Estadu simu informasaun kona-ba projetu prioritariu sira neebe hetan fundu husi Governu Japaun, inklui konstrusaun terminal foun ba pasajeiru sira iha Aeroportu Internasional Nicolau Lobato no espansaun ba Hospital Nasional Guido Valadares ho instalasaun unidade foun ba kuidadu inan no labarik nian.
Prezidente Ramos Horta sublina katak, Japaun iha papel importante iha promosaun ba diversifikasaun ekonomia iha Timor Leste, liu husi investimentu iha setor xave sira, hanesan enerjia renovavel ho implementasaun sentral solar ida iha Manatuto no projetu Carrying Water Project, neebe fo formasaun profesional ba jovem timoroan sira.
Xefe Estadu valoriza importansia husi kooperasaun bilateral nee, destaka apoiu ba tantu projetu boot estruturante sira no programa kapasitasaun rekursu umanu esensial tebes ba progresu sustentavel iha Timor Leste.
(eme)
