DILI, STLTIMORLESTE.com – Embaixador Japaun iha Timor Leste (TL), Kimura Tetsuya halao despedida ho Prezidente Republika (PR), Jose Ramos Horta, iha Palasiu Prezidensial, Nicolau Lobato, Dili.
Iha Loron Segunda (15/12/2025 ) Prezidente Republika, Jose Ramos-Horta simu Vizita despedida Husi Embaixador Japaun nian iha Timor-Leste, iha Palasiu Prezidensial, Nicolau Lobato no vizita nee hanesan kortesia despedida nian ida, iha okaziaun ba remata ninia misaun diplomatika, neebe prevee ona ba inísiu fulan Janeiru.
Durante enkontru, Embaixador Kimura espresa ninia apresiasaun sinsera ba Xefe Estadu ba ninia orientasaun no apoiu neebe nia simu durante ninia mandatu, sublina karater períodu produtivu no fortalesimentu iha relasaun diplomatika entre Timor-Leste no Japaun.
Sorumutu nee foka ba pontu de situasaun husi projetu estratejiku boot haat neebe lao hela daudaun. Embaixador Kimura atualiza Prezidente kona-ba konstrusaun terminal pasajeiru foun iha Aeroportu Internasional Nicolau Lobato, neebe ajenda atu hahu iha tinan oin, nunee mos melloramentu fasilidade sira neebe kontinua lao iha Ospital Nasional Guido Valadares. Embaixador mos destaka progresu husi inisiativa signifikativu rua setor privadu nian neebe envolve konstrusaun ro no dezenvolvimentu Sentral Eletrika Mega Solar.
Prezidente Ramos Horta espresa ninia satisfasaun ho avansu inisiativa eskala boot sira-nee no agradese Embaixador Kimura ba ninia empenu, dedikasaun no kontribuisaun iha kooperasaun bilateral neebe klean.
Xefe Estadu rekonhese progresu signifikativu neebe alkansa durante Embaixador nia mandatu no reafirma kompromisu Timor-Leste nian atu hametin liutan lasu bilateral no kooperasaun entre Timor-Leste no Japaun iha futuru.
Jornalista: Emerenciana Pinto
Editora: Carme Ximenes
