DILI, STLTIMORLESTE.com – Embaixador Republika Indonezia ba Timor Leste, Okto Dorinus Manik ho nia espoza, Flantina Sari Mutiara Silalahi halo despedida ho komunidade Flobamora (Flores, Sumba,Timor, Alor) liu husi Natal 2025 no Tinan Foun 2026 neebe organiza husi Familia Boot Flobamora iha Timor Leste ho tema “Maromak Prezente Hodi Salva Família” (Mateus 1:21-24).
Serimonia selebrasaun Natal 2025 no Tinan Foun 2026 realiza iha Kapela Madre PRR, Manleuna, Dili, Domingu kalan (18/1/2026), hahu ho misa agradesementu ba estrutura foun Flobamora neebe lidera husi Maria Karlos No Udju-Sonbay. Misa agradesimentu prezidi husi Padre Heribertus Ngalu, SCH.P, akompanhia husi Pe. Urbanus Bunga Lolon no amu sira seluk.
Estrutura foun komunidade Flobamora neebe simu pose iha selebrasaun Natal 2025 no Tinan Foun 2026 no despedida Embaixador Okto Dorinus Manik ho familia boot Flobamora iha Timor Leste, kompostu husi Maria Karlos No Udju-Sonbay (Prezidente), Aloysia Gonzaga Pare (Vise Prezidente), Adriana Gana (Sekretariu), Hilaria Maria (Vise Sekretariu), Florida Kedo (Tezoureiru), Emmy Tobi (Vise tezoureiru).
Alein de nee, Xefe Fornu (Ketua Tungku) sira mos simu pose mak hanesan, Pendeta Yunus Nahe (Kupang), Imelda Sau (TTU no TTS), Maria Matilda Settu (Belu), Frans Meak Rayon (Malaka), Adriana Gaina (Sumba), Florida Kedo (Ngada), Sherly Lay Rade (Sabu), Agus Feoh (Rote), Hendrius MasJon (Manggarai), Peres Siga (Nagakeo), Agustina Davince (Maumere), Pak Bolang (Alor) no Aloysia Gonzaga Pare (Lamaholot).
Embaixador Okto Dorinus Manik liuhusi nia diskursu hato’o parabens ba estrutura foun Flobamora neebe lidera husi Maria Karlos No Udju-Sonbay no sempre susesu hodi halao nia knar iha komunidade Flobamora nia leet.
Iha biban nee, Embaixador Okto Dorinus Manik hato’o ninia kumprimentus Natál 2025 no Tinan Foun 2026 ba família boot Flobamora no mos hato’o Ksolok Natal no Tinan Foun ba sidadaun Indonézia tomak iha Timor Leste.
“Tinan foun ida nee lorin bensaun ba ita hotu. Espera katak ho tinan foun nee ita hetan forsa foun, enerjia foun, iha kondisaun sira nia leet neebé bele la favoravel no la konfortavel. Iha dezastre naturál sira iha Sumatra no iha fatin oioin iha mundu tomak. Ida-nee la signifika katak ita la forte, maibé ita sempre hetan forsa hosi Maromak neebé hadomi ita hotu,” dehan Embaixador Okto Dorinus Manik.
Diplomata senior nee mos hatete katak nia ho nia espoza sente orgullu no onradu atu simu roupa tradisionál Rote nian, tanba sira sente halo parte iha komunidade Nusa Tenggara Timur (NTT).
“NTT ho Timor Leste labele haketak malu. Bainhira ami halo resepsaun diplomátiku iha KBRI Dili, ami hetan hatais tradisionál hanesan nee. Prezidente Republika, Jose Ramos Horta mós enkomenda roupa tradisionál ida nee, inklui Sasando no sasán sira seluk, neebé disponivel iha Gabinete Prezidensiál. Kuaze Ministeriu Estranjeiru promove kultural NTT nian nee,” tenik Okto Manik.
Nia mos hatete katak iha loron 19 Dezembru 2025, nia simu pose husi Prezidente Republika Indonezia, Prabowo Subianto iha Palasiu Prezidente (Istana Merdeka) Jakarta, nuudar Embaixador Indonezia ba Port Moresby, Papua Nuguine.
“Tuir lo-loos ami hakarak hela nafatin iha Timor Leste, tanba iha nee familia barak. Tanba nee, susar atu dehan adeus ba ita nia maun-alin sira iha Dili no Timor Leste em geral. Ami hato’o ami nia agradesimentu klean ba apoiu tomak husi ami nia maluk sira husi Flobamora. Hau lembra kalan kulturál neebé Prezidenti Ramos Horta partisipa,” katak Embaixador Okto Manik.
Iha biban nee, Embaixador Okto Dorinus Manik mos husu deskulpa ba asaun ka liafuan ruma neebé maka ladún kontente ba maun-alin sira no sira sente hetan bensaun husi nia belun sira iha Flobamora.
Iha fatin hanesan, Espoza Embaixador, Flantina Sari Mutiara Silalahi mos husu deskulpa ba entidade tomak karik durante mandatu nia laen kaben asumi kargu Embaixador iha asaun ka liafuan neebe ladun kontenti ba maluk sira.
“Ita.boot nia domin no orasaun sai hanesan fonte enkorajamentu ida iha inísiu tinan ida-nee ba ami. Maske ami seidauk hatene saida mak ami nia laen sei halo iha Papua Nuguine, maibe ami sei hasoru malu komunidade Flobamora iha neeba. Tanba nee, ita nia lasu domin nian sei nunka kotu. Bae sonde bae, Flobamora lebe bae.
Fo domin no tempu gratuitu
Entretantu, Prezidente Komunidade Flobamora, Maria Karlos No Udju-Sobay liuhosi diskursu hatete servisu ba komunidade servisu ida neebe voluntariumente sem salariu, fo deit domin oi-oin, sakrifisiu laos buat ida fasil.
“Orgulhu ida ba ita hotu iha Flobamora. Mai ita hakuak malu, lolo liman ba malu. Karik balun iha susar nia laran mai ita fo oklu balun kontente no mai ita fo ita nia kotuk hodi haksolok nafatin, fo hakuak manas ba ita nia maun alin sira nebe foin halo migrasaun mai Timor Leste. Bae sonde bae Flobamora lebe bae,” tenik Maria Karlos.
(mik/ger)
