JAKARTA, STLTIMORLESTE.com – Embaixador Timor Leste ba Republika Indonezia, Roberto Soares akompanha husi nia Espoza Sra. Cecília da Costa Salsinha Soares, ofisiálmente aprezenta karta kredensiál ba Prezidente Repúblika Indonézia, Prabowo Subianto, nuudar Embaixadór Extraordináriu no Plenipotensiál Timor Leste nian ba Repúblika Indonézia.
Embaixador Roberto Soares aprezenta karta kredensiál ba Prezidente Repúblika Indonézia, Prabowo Subianto nee iha Palasiu Prezidente ka Istana Merdeka, Jakarta, Segunda (4/11/2024).
Iha biban nee, Embaixadór Roberto Soares aproveita hato’o saudasaun espesiál husi Prezidente Repúblika, José Ramos Horta no Primeiru Ministru, Kay Rala Xanana Gusmão ba Prezidente Republika Indonezia, Prabowo Subianto no dezeja saúde diak no susesu ba Prezidente, no garante katak Timor Leste sei kontinua tane aas ninia polítika esterna, mantein relasaun amizade no kooperasaun espesiál ho nasaun viziñu sira, liuliu ho Repúblika Indonézia.
Iha intervista badak ho mídia, Embaixadór Roberto Soares hateten katak durante nia mandatu nia sei hakaas-an atu hametin liután relasaun bilaterál no kooperasaun entre Timor Leste no Indonézia.
Embaixadór nee mós haktuir hikas katak relasaun bilaterál no kooperasaun ho Indonézia nee multifasetu no abranje setór hotu-hotu, hanesan, setor politika, defeza, seguransa no imigrasaun, komérsiu, indústria no investimentu, edukasaun, saúde, programa formasaun profisionál, relasaun sosiokulturál no ema ba ema, salvaguarda independénsia, soberania no integridade nasionál, no mós rekonsiliasaun entre Timor.Leste no Indonézia nuudar parte importante ida iha relasaun entre nasaun rua nee no prosesu rekonsiliasaun nuudar mós modelu globál ida.
Embaixadór Roberto Soares mós hateten katak adezaun ba ASEAN hanesan mós kompromisu importante ida neebé Timor Leste halo hodi kontribui ba pás no estabilidade rejionál, no mós kreximentu ekonómiku iha Sudeste Aziátiku.
Kona-ba ida nee, nia sei halo nia kbiit tomak hodi servisu besik ho nia omólogu indonéziu sira no parseiru diálogu sira iha Jakarta hodi garante Timor Leste nia adezaun ba ASEAN.
Embaixadór Roberto Soares mós espresa ninia konfiansa iha kompromisu no matenek husi lideransa nasaun rua nee nian hodi garante identidade rejionál Timor-Leste nian, nunee mós atu garante rezolusaun ba kestaun bilaterál residuál sira, partikularmente kona-ba fronteira terrestre no fronteira marítima tuir prinsípiu husi “uti possidetis juris”, UNCLOS no lei internasionál neebé relevante.
(mik)
