DILI, STLTIMORLESTE.com – Embaixador Tailandia iha Timor Leste, Atipat Rojanapaibulya ho ekipa apoiu doasaun ba Prezidensia Republika (PR), hodi tulun ba komunidade kbiit natoon sira.
Bainhira remata fahe doasaun, Xefe Kaza Sivil Prezidensia Republika, Jesuina Maria Ferreira Gomes ba jornalista sira iha Palasiu Prezidensial, Nicolau Lobato, Bairo Pite, Dili, Segunda (29/12/2025) hatete, ohin Embaixador Tailandia iha Timor Leste apoiu sosial ba Prezidensia Republika, atu selebra epoka natal nomos tinan foun.
“Ohin Embaixador Tailandia ho nia senhora no estrutura sira iha Embaixada, sira lori apoiu sosial mai fo ba Prezidensia Republika, atu selebra epoka natal nomos tinan foun, sira iha grupu voluntaria neebe sempre fo apoia ba komunidade sira neebe presiza liu,” dehan Xefe Kasa Sivil, Jesuina.
Xefe Kaza Sivil nee hatutan, item sira neebe lori mai iha Prezidendia Republika mak hanesan fos, mina, eskova nehan, sabaun haris, ida neebe bele ajuda ema sira neebe presiza hanesan orfonatu sira nomos komunidade sira neebe presiza nesesidade bazika husi apoiu nee bele tulun fali sira.
Maibe Embaixada Tailandia laos deit iha natal mak mai fo apoiu maibe kuandu sira iha programa nee apoiu nafatin ba kantina matak nomos too ba iha dapur ba povu ida neebe establese iha Oecusse, neebe sira sempre apoiu programa prezidensia nia liu husi dapur ba povu nomos apoiu sosial neebe unidade serbisu sosial mak sei distribui ba komunidade neebe presiza.
“Kuantidade foos saka 10, mina kaisa 1, eskova lubuk ida nomos sabaun lubuk ida,” hatete Jesuina.
Jesuina dehan, doasaun neebe apoiu husi Embaixador Tailandia ho ekipa mai Palasiu Prezidensial ida nee serbisu apoiu sosiedade sivil mak sei responsabliza ba iha apoiu sira nee, kuandu iha pedidu husi komunidade sira ou dala ruma ema kbiit laek sira mai iha kantina matak hasoru Prezidente presiza fos bele uza apoiu sira nee hodi fo ba sira.
Jornalista: Emerenciana Pinto
Editora: Carme Ximenes
