DILI, STLTIMORLESTE.com – Embaixador Timor Leste (TL) ba Nasaun India, Carlito nunes halao enkontru ho Primeiru Ministru (PM), Kay Rala Xanana Gusmão, hodi agradese ba konfiansa no simu orientasaun molok halao misaun diplomasia reprezenta Estadu iha nasaun India.
“PM Xanana fo orientasaun atu foku ba setor balun neebe durante nee iha ona akordu liu husi asinatura nota entendimentu ho Governu India, balun konsege implementa maibe balun seidauk konsege tanba TL seidauk iha ninia embaixada iha India, nunee mos India seidauk iha embaixada iha Dili,” Carlito Nunes hateten ba jornalista sira iha Palasiu Governu, Kuarta (21/05/2025).
Nia dehan, ho estabelesimentu Embaixada TL iha Nova Deli India nomos Embaixada India nian iha Dili, sei haforte liu tan relasaun entre nasaun rua nian atu bele implementa akordu ho nota entendimentu sira neebe iha ona ho prinsipiu mutua entre interese nasaun rua nian.
Iha Agostu 2024, primeira vizita Estadu Prezidente India, Petahana Droupadi Murmu iha TL, asina nota entendimentu tolu mak hanesan, primeiru livre ba pasaporte diplomatiku ho pasaporte servisu neebe agora implementa ona, segundu mak akordu kona-ba programa interkambiu kultural agora daudaun sei iha koordenasaun ho Sekretariu Arte no Kultura atu bele implementa no terseiru mak akordu kona-ba broadcasting husi Televizaun India nian ho media Estatal RTTL,EP neebe sei iha koordenasaun atu bele haree hamutuk.
Iha mos akordu lubuk ida dezde tinan 2015 too 2024, estabelese akordu ho Ministeriu Saude kona-ba kuidadu saude publiku no akordu nee invalidu ona presiza atu halo renovasaun iha tempu badak.
Ida seluk mak kona-ba akordu iha area edukasaun nian neebe kada tinan India oferese bolsu estudu 25 mai TL no idanee mos hanesan akordu ida neebe sei foka durante mandatu Embaixador Carlito Nunes halao misaun iha India.
Akordu ida tan entre India ho TL maknsei loke Sentru Informasaun Teknolojia (IT), maibe TL mak seidauk fo espasu, tanba nee akordu nee seidauk bele impelementa, India rasik sei mai ho peritu sira, ekipamentu atu fo formasaun ba foinsae sira.
Nia dehan, iha mos akordu ida kona ba estudante medisina husi India neebe agora daudaun iha nain 300 mak halao hela estudu iha TL, balun iha Universidade Catolica Timoresne (UCT) no balun iha Universidade da Paz (UNPAZ).
“Ida nee sira mai ho sira nia profesor no sira nia fasilidade rasik, hanorin mak iha nee uza deit ita nia espasu. Depois sira sei akredita tuir padraun internasaional, tanba uza hela sistema rua TL ho India, nunee tenke hetan akreditasaun atu sira bele asesu ba servisu iha nasaun neebe deit,” nia hateten.
Primeiru Ministru fo orientasaun ida espesifiku ba Embaixador nee atu esplora liu tan oportunidade hodi halo akordu iha area eko turizmu.
Prezidente Republika (PR), Jose Ramos Horta fo pose ba Carlito Nunes nuudar embaixador estraordinariu no plenipotensiariu dahuluk TL nian ba India iha Kuarta 14 maiu 2025, iha Palasiu Prezidente Nicolau Lobato, Bairo Pite.
Tuir planu, Carlito Nunes sei arranka iha semana nee nia laran atu bele hahu misaun hanesan reprezentante Estadu TL iha India.
(jos)
