DILI, STLTIMORLESTE.com – Embaixador foun Japaun iha Timor Leste (TL), Yayushi Yamamoto aprezenta aan hodi realiza enkontru dahuluk ho Primeiru Ministru (PM), Kay Rala Xanana Gusmão iha Palasiu Governu.
Enkontru nee hanesan momentu importante ida iha relasaun diplomátika entre nasaun rua nee.
Foku prinsipal husi enkontru nee mak diskute no hametin kooperasaun bilateral entre Japaun no Timor Leste, partikularmente iha area sira hanesan dezenvolvimentu ekonomiku, infraestrutura, edukasaun, saude, agrikultura no asistensia teknika.
Durante sorumutu, Embaixador nee espresa Japaun nia apoiu kontinuadu ba Timor Leste nia dezenvolvimentu no diskute kona-ba projetu sira neebe lao daudaun ho parseria sira iha futuru.
Japaun sai hanesan parseiru importante ida ba Timor Leste, liu-liu iha finansiamentu ba projetu infraestrutura sira no area asistensia ba dezenvolvimentu sira seluk, hanesan saude no edukasaun.
Posivel mos katak diskute asuntu rejional no global neebe afeta nasaun rua nee, hanesan mudansa klimatika, seguransa no estabilidade rejional ka asuntu seluk neebe iha interese komún.
“Foin hasoru malu ho Primeiru Ministru Xanana Gusmão, koalia furak tebes ho nia. Nia introdús relasaun neebe diak tebes ho polítiku Japaun balun no mos iha belun diak barak husi Japaun. Primeiru Ministru sei ajuda hau atu lao hamutuk servisu makaas liu tan hodi hametin relasaun Timor Leste ho Japaun. Hau promete atu halo hau nia knaar diak liu iha futuru,” informa Yayushi Yamamoto iha Palasiu Governu, Sesta (30/01/2026).
Yasushi Yamamoto ofisialmente asume knaar nuudar Embaixador foun Japaun nian iha Timor Leste, hodi troka Embaixador sesante, Kimura Tetsuya no halo aprezentasaun karta kredensial ba Prezidente Republika (PR), José Ramos Horta iha loron 9 Janeiru 2026.
Embaixador Yamamoto Yasushi nuudar diplomata senior ho esperiensia klean iha Ministeriu Negosiu Estranjeiru Japaun nian, neebe antes nee asume ona kargu iha Filipina, Xina, Koreia Sul no servisu nuudar Embaixador ba Uniaun Europeia.
Embaixador Yamamoto iha kompromisu atu hametin amizade no kooperasaun entre Japaun ho Timor Leste, ho foku makaas ba seitor xave sira mak bee no saneamentu, infraestrutura no apoiu mediku.
(alb)
