DILI, STLTIMORLESTE.com – Embaixadora Estadus Unidus Amerika (EUA) halo despedida ho Prezidente Republika, Jose Ramos Horta, tanba nia reforma ona.
Bainhira remata hasoru malu, Embaixadora Estadus Unidas Amerika, Donna Ann Welton ba jornalista sira iha Palasiu Prezidensial, Nicolau Lobato, Bairo Pite, Dili, Tersa (18/02/2025) hatete, mai hasoru malu ho Prezidente Republika hodi hatoo agradese ba kooperasaun servisu no amizade neebe halo durante nee.
“Hau atu reforma ona iha tempu badak, hau sei fila fali ba hau nia nasaun no ohin hau mai enkontru ho Prezidente Republika Jose Ramos Horta hodi hatoo hau nia agradesimentu ba ita nia amizade kooperasaun, hau espera katak ba oin ita nia amizade kooperasaun nee bele metin nafatin no bele kontinua nafatin,” dehan Embaixadora nee.
Embaixadora Estadus Unidas Amerika hatete, ohin hasoru malu nee koalia mos kona-ba asuntu nivel global nomos kooperasaun iha setor ekonomiku no seluk tan.
“Ita iha kooperasaun iha nivel hotu-hotu, iha nivel Global iha nasoens Unidas, ita mos iha kooperasaun iha asuntu defeza nia, iha setor ekonomiku sosial, entaun ohin ami rua koalia kona-ba asuntu kooperasaun hotu-hotu,” katak nia.
Nunee mos Prezidente Republika, Jose Ramos Horta hatete, ohin mos simu Embixadora Estadus Unidas Amerika, tanba nia mandatu rasik mak remata ona.
“Ohin simu Embaixadora Estadus Unidas Amerika, tanba nia mandatu rasik remata ona, nia rasik mos remata nia servisu iha departamentu estadu tanba idade limite ona nia fila ba EUA, no ami koalia kona-ba relasaun bilateral, programa saida mak iha sei kontinua ka lae? Primeiru hau koalia tiha ona ho maun Boot Xanana buat neebe Estadu Unidus Amerika administrasaun foun hakarak halo kona-ba bilateral nee sira nia desizaun ita nia relasaun ho Amerika,” katak nia.
Prezidente Republika hatete, Timor nia relasaun ho Amerika bazeadu iha valor no prinsipiu nee kontinua, hanesan uluk kedas administrasaun hahu uluk kedas.
(eme)
