DILI, STLTIMORLESTE.com – Jurista Timoroan Sergio Dias Quintas konsidera katak, tuir lo-loos Emilida Pires labele hetan pensaun vitalisia, tanba nia iha ona antesednsia kriminal.
“Hau hanoin Bankada PLP iha razaun, tanba Emilia nee desizaun Tribunal sai tiha ona nia nuudar kondenada, ema neebe kondenada nee nia iha ona antesedensia kriminais, nia naran tama ona iha boletim kriminais, ema neebe kondenada nia naran tama ona iha boletim kriminal signifika katak, durante asumi nia papel nuudar Ministra Finansas nee iha buat ruma lalos,” dehan Jurista ba jornalista STL iha Kaikoli, Sesta nee (11/07/2025).
Nia hatutan, tanba saida mak Estadu liu husi Governu tenke kria privilejiu ida hodi fo pensaun vitalisia ba kondenada nee, ida nee buat ida neebe la diak, nao ser durante asumi nia papel nia komporta diak la iha atensedensia kriminal no nia naran mos la tama iha boletim rejistu kriminal nia merese bele hetan pensaun vitalisia.
Esplika tan, tanba deit kondenada nia la merese hetan pensaun vitalisia nee, tuir los Governu haree osan sira hanesan nee nia utilizasaun ba buat seluk. Ezemplu nusa osan nee la uza hodi rezolve maluk balu neebe sei moris iha mukit, tanba sa mak osan nee atribui ba ema sira neebe la merese, se nia la kondenada ida nee buat seluk ida.
Reforsa, iha ita nia rain Governu ezije ba joven sira atu komporta diak, ezemplu se karik servisu iha repartisaun publiku privadu ka rai liur, Governu ezije joven sira tenke komporta diak, signifika katak sira tenke ba trata surat bom komportamentu iha Rejistu Notariadu, ida nee Governu nia ezijensia, maibe iha sorin seluk ba politiku nain sira liu-liu ba sira neebe eis Governante iha sorin seluk kria fali kondisaun ka previlejiu ida ba sira, ida nee ironiku tebes.
Sublina, iha sorin seluk ezije joven sira tenke komporta diak hodi emite bom komportamentu ba sira, tanba joven balu mak hetan kondenasaun Estadu liu husi Notariadu la emite bom komportamentu. Iha sorin seluk kria fali buat seluk ba Emilia, ida nee buat ida neebe ironiku no politika neebe sala ona.
“Ba hau Emilia la merese, tuir lo-loos pensaun vitalisia nee hakotuk, assim que nia sai kondenada mezmu ke Prezidente Republika atribui tiha ona indultu ba nia ho lei foun nee, mas buat ida antesedensia kriminal no rejistu kriminal ita labele hamoos tanba tama ona iha sistema, neebe hamoos nee labele,” dehan Sergio.
Iha sorin seluk, Akademiku Rafael de Jesus konsidera katak, ida nee la justu, tuir lo-loos pensaun nee atribui ba ema neebe iha komportamentu diak.
“Hau hanoin ida nee la justu, se Estadu halo ida nee sai preokupasaun ba sosiedade sira, tuir lo-loos Estadu atu halo ida nee tenke haree didiak,” dehan nia.
Hanesan Akademiku husu atu fo esplikasaun klean ba iha publiku kona-ba Emilia hetan pensaun ho razaun saida, atu labele hamosu preokupasaun iha sosiedade nia leet.
(ter)
