DILI, STLTIMORLESTE.com – Emprezáriu husi Makau ho Xina interesadu atu investe iha Timor Leste, tanba nee sira nain 10 resin hasoru malu ho Primeiru Ministru (PM), Kay Rala Xanana Gusmão, hodi hato’o interesadu hakarak hirak nee.
Hasoru malu entre PM Xanana Gusmão ho emprezáriu estranjeiru hirak nee, iha Palasiu Governu, Segunda (04/11/2024), neebe akompanha husi emprezáriu Timoroan nain rua, hanesan Claricia Lay ho Helder Vieira neebé hakarak halo investimentu iha setór agrikultura, konstrusaun sivíl, turizmu, peska no seluk tán.
“Emprezáriu sira husi Xina ho Makau mai hatudu sira nia vontade atu investe iha Timor, iha área oin-oin i hau hatoo benvindu bá sira”, katak PM Xanana bainhira remata hasoru malu ho emprezariu sira.
Xefi Governu Xanana husu, molok halo investimentu tenke halo uluk vizita bá munisípiu sira atu konhese diak fatin no área produtivu sira.
“Sira dehan ita nia rai produtivu, sira mós hatene katak, ita sosa buat hotu-hotu, tanba nee mak sira hakarak mai investe hodi apoia ita”, tenik Xanana.
Nunee mos Emprezária Timoroan, Claricia Lay hateten, emprezáriu sira nee sei lao haleu munisípiu hodi haree saida mak presiza liu atu hahú.
Claricia Lay informa, iha emprezáriu nain 10 resin husi Xina ho Makau mak interesadu atu investe iha TL, maibé ohin iha emprezáriu nain hitu mak hasoru malu ho Xefi Governu.
Empreza sira nee kompostu husi Top Builders Group Ltd. Husi Macau, Huafa-China Construction Co. Ltd. husi Xina, Zhuhai, Top Builders Group Ltd. husi Macau, Construction Engineering Corporation No.3 Bureau husi Xina, Timor Macau Água Nova Unipessoal, Lda, husi Timor Leste, Hua-Ko Construction material technology Co. Ltd., Zhuhai husi Xina, Zhuhai Hong Wan Ocean Fishing Cooperation Limited, Zhuhai husi China, Wasen Building Technology Co. Ltd., Shenzhen husi China, Lian Fa Logistic Company, Zhan Jiang husi China, Hua Rong Construction Group Ltd no Nam Tong, husi Xina.
(gui)
