DILI, STLTIMORLESTE.com – Prezidente Republika (PR), Jose Ramos Horta hatete, Enjeñeiru Navais Amerikanu fo kontribuisaun barak ona ba dezenvolvimentu Timor Leste (TL).
Prezidente Republika Jose Ramos Horta hatoo lia hirak nee liu husi nia diskursu bainhira partisipa US Navya Seabee Change Of Charger Ceremony iha Komoro, Kuarta (02/07/2025).
PR Horta hatoo agradese ba Seabees Marinha Estadus Unidu no husu aumenta destakamentu iha serimonia mudansa komando.
Iha biban nee Prezidente Republika, Jose Ramos Horta hatoo agradesimentu boot ba Marinha Estadu Unidu (EUA) ba solidariedade no kooperasaun kontinu ho Timor Leste, no husu atu aumenta destakamentu Seabees durante serimonia mudansa komandante unidade nee.
“Papel importante neebe Enjeñeiru Navais Amerikanus halao ba dezenvolvimentu nasional hahu husi restaurasaun independensia, sublina kontribuisaun sira iha konstrusaun eskola, sentru saude no atuasaun sira iha tempu emerjensia hanesan inundasaun no dezastre natural sira,” dehan PR Horta.
Xefe Estadu Ramos Horta sublina impaktu global forsa armada norte amerikana nian iha asaun umanitaria, hatudu ezemplu hanesan resposta lalais ba rai nakdoko iha Pakistaun no tsunami 2004 iha Aceh, Indonezia.
“Forsa Defeza Amerikanu mak forsa ba dame no solidariedade, hatene no elojia tan missão sira husi naviu-hospital USNS Mercy iha rejiaun neebe fornese servisu mediku importante, inklui operasaun matan (katara),” dehan PR Horta.
Durante diskusaun foin lalais nee ho Sekretariu Defeza Estadus Unidus Amerika, Lloyd Austin iha Singapura, hateten importante atu mantein, se possível, aumenta kolokasaun atual Seabee nian neebe maizumenus pesoal nain 100 resin.
Pedidu nee sublina papel stratejiku husi prezensa militar Norte Amerikanu nian hodi promove estabilidade no dezenvolvimentu rejional, konsidera hanesan enviadu sira dame nian neebe reprezenta valor umanitariu norte-amerikanu sira iha mundu tomak.
(eme)
